Позицијата прв вицепремиер ќе остане и во новата влада, а Министерството за политички систем и односи помеѓу заедниците, кое ќе биде преименувано во Министерство за односи меѓу заедниците, нема да го раководи кадар на коалицијата „Вреди“, рече лидерот на Движењето Беса во интервју за „360 степени“ на МРТ 1
Министерството за политички систем и односи меѓу заедниците беше синоним за злоупотреба од Артан Груби и ДУИ на институциите, па затоа не би сакале да продолжиме да бидеме налик на нешто што сме го критикувале, вели претседателот на Движењето Беса и еден од предводниците на коалицијата „Вреди“, Билал Касами, во интервју за „360 степени“ на МРТ 1.
Според Касами, позицијата министер за односи помеѓу заедниците не била програмска определба на ВЛЕН, а дополнително и поради честите злоупотреби кои, како што кажа, ги правел министерот Груби, не сакаат да го добијат во распределбата на владиниот колач.
Дали е точно дека Министерството за односи меѓу заедниците, кое сега се вика Министерство за политички систем и односи меѓу заедниците, во јавноста познато како министерството на Артан Груби, нема да ѝ припадне на коалицијата ВЛЕН – беше едно од прашањата до Билал Касами.
„Мислам дека тоа беше едно од министерствата кои беа синоним на злоупотреба на Груби и на ДУИ на институциите и знаеме дека во рамките на тоа министерство беа фиктивно вработени многу граѓани кои потоа немаше каде да одат на работа… Како да беше дизајнирано за Артан Груби, за да му се најде место, и беше еден од примерите како претходната влада работеше наместо да најде соодветни кадри за институциите. Се знаеше дека претходно тоа беше Секретаријат за имплементација на Охридскиот рамковен договор, па потоа направија министерство, па го ставија и политичкиот систем, па го додадоа и прв вицепремиер… Затоа, не би сакале ние да продолжиме да бидеме налик на нешто што сме го критикувале“,
вели Касами.
Лидерот на БЕСА не сакаше да открива детали во однос на тоа колку вицепремиери ќе добие коалицијата „Вреди“, но потврди дека позицијата прв вицепремиер ќе остане и во новата влада.
Кога станува збор за најавеното реструктуирање на министерствата и основање нови, со што од 16 ресори како што е сега, во владата би имало 20 министерства, Касами вели дека најверојатно ќе нема многу министри без ресор како што било пракса досега.
„Само таму каде што ќе има нешто конкретно во дел на програмските определби на владата ќе треба да има министри без ресор, главно сите би требало да покријат одреден ресор, бидејќи сакаме да имаме поефикасна влада и тоа што ќе биде назначено да има и конкретни работи, т.е надлежности со кои ќе се занимава. И ова е во рамки на таа реорганизација, затоа што во дел на ресорите одат од едно во друго, дел се делат, но не зборуваме за нешто ново кое е надвор од овој систем, туку зборуваме за реорганизација на целата влада и институуците кои се под нејзината надлежност за да биде поефикасна согласно одредени стратегии кои ги имаме“,
кажа Касами.