Хируршките сали, како што изјави денеска на прес-конференција министерот за здравство, во меѓувреме за потребите на итните случаи ќе се снабдуваат со кислород и компримиран воздух преку надворешни компресори. Другите полесни пациенти на кои им е потребна хируршка интервенција ќе се препраќаат во Градската општа болница „Св. Климент Охридски“ и во „8 Септември“
Странска фирма во Сојузна Република Германија до која денеска се испратени мостри ќе го утврдува квалитетот на кислородот и компримираниот воздух од централниот систем на Клиничкиот центар „Мајка Тереза“ поради чија „мистериозна“ непријатна миризба повеќе од една недела не работат хируршките сали на Клинички.
Дотогаш, како што изјави министерот за здравство Илир Демири на денешната прес-конференција, ќе се вршат хируршки интервенции кај итни и неодложни пациенти, а салите ќе се снабдуваат со кислород и компримиран воздух преку надворешни компресори кои се инсталирани во меѓувреме по појавувањето на непријатната миризба од централниот систем за која, како што изјави, нема објаснување од каде доаѓа.
Другите полесни пациенти на кои им е потребна хируршка интервенција ќе се препраќаат во Клиниката „Св. Наум Охридски“ и во „8 Септември“.
Демири на почетокот на своето излагање на прес-конференцијата даде хронологија на настаните што претходеле на појавата на миризбата на 18 мај поради која беа затворени хируршките сали.
Тој кажа дека пред еден месец имало хаварија на компресорската станица, во која бил констатиран дефект на еден од компресорите, кој бил исклучен, по што Клинички продолжил да функционира со два компресори.
„Значи, некаде пред 30 години се градени тие хируршки сали и е поставена таа инсталација за снабдување со кислород и компримиран воздух, значи точно 30 години е компресорската станица. Пред еден месец од денеска имаше хаварија во компресорската станица, кога се расипа еден од компресорите и доведе до оштетување, влегување на масло во тие цевки, по што тој компресор е ставен надвор од функција. Беа три компресори, Клиниката почна да функционира со два компресори, ги прочистивме комплетно цевките, поминаа технички преглед од две независни институции кои не се поврзани со Клиничкиот центар. За сметка на квалитетно испорачување на компримиран воздух, ја прекративме од функција хипербарната комора која е дел од Пластична хирургија. Побарав итно од менаџерите да поднесат барање за да може итно да се сервисираат истите компресори“,
рече Демири.
По ова, на 18 мај без да биде детектирана некаква нова хаварија се појавила непријатната миризба во дистрибутивната мрежа за кислород и компримиран воздух.
„Значи, без да има никаква хаварија во системот, едноставно се појави лоша миризба во дистрибутивната мрежа за кислород и компримиран воздух поради што веднаш реагиравме. Ги повикавме повторно независните фирми, а тоа е ‘Пегаз’ и компанијата ‘Дрегер’. Спроведоа испитување. Бидејќи во Република Северна Македонија нема лиценцирана лабораторија која може да даде дозвола или уверение кое ќе послужи во јавноста како потврда за квалитетот на испорачаните гасови, побаравме странска компанија и денеска се испратени мостори во Сојузна Република Германија да се испитаат“,
изјави министерот за здравство.
Испитувањата на двете фирми, како што кажа Демири, не констатирале никаков недостиг во квалитетот на гасовите, освен зголемена влага и препорачале на двапати да се менуваат филтрите на компресорската станица. Сепак, како што наведе министерот, наодите на фирмите се само за интерна употреба и тие не можат да се користат како референтен доказ дека сè е во ред со квалитетот на кислородот и компримираниот воздух од централниот систем за хируршките сали во Клиничкиот центар.
„Ако немаме валиден документ на кој може да се повикаме за да ги користиме салите, се одлучивме за алтернативно решение – сите случаи кои се предвидени во Клинички центар да се откажат и да се оперираат само итни случаи, а дистрибуцијата на пациенти за неурохируршки потреби да биде во Градската општа болница, додека за другите интервенции во ‘8 Септември’ и набавени се шест компресори кои се надворешни и можат да послужат за итни и неодложни интервенции кои се од покомплициран карактер и да послужат за потребите на пациентите кои се на Клиниката за анестезиологија, реанимација и интензивно лекување (КАРИЛ), каде што добиваат квалитетен воздух“,
рече Демири.
Како што објасни тој, кога се приклучени на надворешните компресори, во салите го нема непријатниот мирис, но кога ќе се приклучат на централниот довод на кислородот се јавува миризбата.
Поради ваквиот случај, тој побарал и од обвинителството да спроведе истрага за случајот.
„Бидејќи е необјасниво, побарав од обвинителството да спроведе истрага и да се види што е реалната причина за проблемот. Додека не заврши испитувањето и додека не дојдат резултатите од анализите од Германија, Клинички центар ќе се служи со надворешни компресори“,
изјави Демири.
Прашан кој ќе ја понесе одговорноста затоа што девет дена не работат хируршките сали во Клиничкиот центар „Мајка Тереза“ и колку директори од хирургија досега поднеле оставки до него, Демири одговори дека немам ниту една оставка која му е доставена. Сопственоста на компресорската станица рече дека не е на Универзитетските клиники за хирургија и на КАРИЛ, туку на службите за општи и заеднички работи.
„За жал, општи служби не е јавна здравствена институција, туку е државна институција под ингеренции на Владата на Република Северна Македонија. Поради овие збиднувања, и немаме континуитет за кој се ангажирам овој период како министер за здравство во техничката влада. Побарав алтернативни решенија и ја спроведовме поправката. Значи, менаџерите на државни институции, независно дали се медицински или не се медицински, тие сносат секако одговорност за одржување, редовно сервисирање и да има континуитет здравствениот систем. Токму тоа што Република Северна Македонија како највисока установа за секакви хируршки интервенции го има само Клиничкиот центар ‘Мајка Тереза’ затоа бев принуден да го известам и Обвинителството и да се бара која е причината“,
рече министерот за здравство.
Тој рече дека не е министер четири години, туку само два месеци и оти го дава максимумот за да се реши проблемот.
„Ги имам ангажирано сите можни ресурси како Министерство и сум дал налог независно која е цената таа компресорска станица комплетно да се реставрира. Значи, независно која е цената. Јас не можам да менувам план за јавни набавки ако нешто не е предвидено, а тоа не е предвидено во планот за јавни набавки“,
рече Демири.
На прашањето дали ја информирал Владата и дали побарал да се разгледа што прави заедничката служба, министерот за здравство кусо одговори:
„Тоа денеска ќе се информира Владата“.
За колку време ќе пристигнат анализите од Германија, министерот за здравство рече дека нема рок до кога треба да ги очекуваат.