Излегувањето од изолација е многу посложено отколку влегувањето, бидејќи треба да се управува со еволуцијата на вирусот, рече францускиот претседател Емануел Макрон во изјава за француската национална телевизија, пренесе МИА.
„Овој период, што почнува на 11 мај, е наша колективна одговорност. После три недели ќе видиме дали има зголемување на бројот на лица во болниците за итни случаи, и ќе процениме каде сме“,
појасни Макрон.
Притоа, тој најави дека следниот четврток е закажан Советот за безбедност на земјата, на кој ќе бидат донесени конкретните одлуки за излегувањето од изолацијата.
На прашањето за можноста повторно да се отвори пристапот до плажите ова лето, Емануел Макрон не даде прецизен одговор.
„Ние не ја добивме битката. Ние ја успоривме. Ние отвораме нова фаза во моментов, и ако сите сме одговорни, ќе стигнеме таму. Ќе ги ограничиме меѓународните патувања за време на летните одмори. Ќе се обидеме да останеме во Европа, па дури и во поограничено подрачје. Повеќе ќе знаеме на почетокот на јуни, рано е да се каже денес“,
рече Макрон.