Со одлуките на Управниот суд се потврдуваат решенијата на ДИК за прегласување во шест избирачки места во петтата изборна единица и едно во шестата изборна единица.
Управниот суд ги отфрли како неосновани сите седум тужби од „Европскиот фронт“, поднесени против решенијата на Државната изборна комисија поврзани со изборите одржани на 8 мај. Со одлуките на Управниот суд се потврдуваат решенијата на ДИК за прегласување во шест избирачки места во петтата изборна единица и едно во шестата изборна единица. Прегласувањето на тие избирачки места треба да се случи на 22 мај, а според приговорите, може да влијае на конечните резултати од гласањето.
Судот за тужбите расправаше на посебни седници во текот на вчерашниот ден до полноќ, а дел од одлуките предизвикаа низа реакции и меѓусебни партиски обвинувања.
Од коалицијата „Вреди“ ја поздравија одлуката оценувајќи дека е во согласност со волјата на граѓаните, а од „Европскиот фронт“ претходно обвинија за изборен инженеринг кој, како што рекоа, има за цел да го промени односот на бројките во Собранието преку политички договор.
„Со политички договори и монструозен антидемократски план, зготвен во партиските штабови на ВМРО, СДСМ и ‘Вреди‘, се прави обид да се наруши волјата на граѓаните“,
реагираа од ’Европскиот фронт’.
Петседателот на Управниот суд, Бурим Сејдини, пак, се пожали дека е жртва на клевети и ги оцени како неосновани инсинуациите дека тој прави притисок врз колегите како да гласаат.
„Лично како претседател на Управниот суд немам потреба да стравувам, односно не знам да стравувам за мојата работа да ја вршам одговорно. Датумите кои се спомнуваат како 15 јуни или други датуми ги гледам како денови во кои со личниот интегритет и капацитет ќе можам да придонесам за доброто на нашата земја. Истото можам да го кажам и за судиите од овој суд дека деновите, датумите ги гледаме како можности да придонесеме за поквалитетна правда во нашата земја“,
порача Сејдини.
Неговата реакција следуваше по изјавите на лидерот на Алијанса за Албанците, Арбен Таравари, дел од коалицијата „Вреди“, дека Сејдини врши притисок врз судиите кои одлучуваат за тужбите од коалицијата „Европски фронт“ против решенијата на Државната изборна комисија за поништување на гласањето на парламентарните избори во одредени избирачки места.
Претходно и мнозинството членови на ДИК испратија писмен допис потенцирајќи дека се загрижени за неоснованите јавни политички притисоци и закани за кривична одговорност поради нивните одлуки по приговорите за парламентарните избори. Покрај претседателот на Комисијата, Александар Даштевски, потпишани се членовите Радица Ристеска, Оливер Ристоски, Борис Кондарко, Бобан Стојановски и Абдуш Демири, со исклучок на потпретседателката на ДИК, Дитмире Шеху, која не е потпишана на реакцијата.
„Ве известуваме дека покрај тоа што сме лично понижувани и навредувани, исто така како членови во највисоката институција за организирање и спроведување на изборите, сме изложени и на неосновани и непримерени јавни политички притисоци и на закани за кривична одговорност поради донесените одлуки на ДИК“,
наведоа од ДИК.
Реакцијата на ДИК следуваше по низата обвинувања од „Европскиот фронт“ од каде што излегоа со став оти на членовите на ДИК им бил извршен политички притисок преку партиски инструкции во однос на приговорите, а за ова, како што рекоа, ги информирале сите надлежни институции и меѓународниот фактор. Со сличен став излезе и премиерот Талат Џафери, кој на прес-конференција претходниот ден порача дека од учесници во изборите добил извештаи за обиди за изборен инженеринг со цел менување на соодносот на бројот на пратеници во Собранието.
Тој ги повика институциите и Управниот суд да ја штити кредибилноста на изборниот процес, која, како што рече, е прифатена и поздравена од сите политички субјекти и од меѓународниот фактор, и да постапи законски и без партиски или политички директиви од која било страна.