Во писмото до францускиот претседател Емануел Макрон, еден локален политичар ја опишал ситуацијата како граѓанска војна
Во нередите во француска Нова Каледонија поради реформата на изборниот закон, во изминатите три дена загинаа пет лица, а стотици куќи беа уништени или оштетени, пишува денеска „Ноје цирхер цајтунг“.
Најмалку 300 луѓе се повредени, а локалните медиуми објавија фотографии и видеа од ограбени супермаркети и бензински пумпи.
На улиците имало околу 5 000 демонстранти, а двајца од загинатите се припадници на безбедносните сили.
Во писмото до францускиот претседател Емануел Макрон, еден локален политичар ја опишал ситуацијата како граѓанска војна. Француската влада потоа прогласи вонредна состојба на архипелагот во близина на Австралија во средата.
Претходно во вторникот најави привремено блокирање на видео апликацијата Тик-ток, со цел да се отежне комуникацијата меѓу демонстрантите.
Стотици полицајци се прераспоредени во главниот град Нумеа за да ги поддржат локалните сили. Во акцијата за смирување на ситуацијата сега учествуваат 2 700 полицајци.
Нова Каледонија се наоѓа на 1 500 километри источно од Австралија. Таа била француска колонија од 1853 до 1946 година, а денес е прекуморска територија со посебен статус. Жителите на Нова Каледонија се Французи, но архипелагот не припаѓа на Европската Унија.
Протестите се активираа поради уставната реформа која на новонаселените жители им дава право на глас во Нова Каледонија, а со тоа и поголемо политичко влијание.
Според сегашните прописи, на изборите на архипелагот можат да учествуваат само оние жители на Нова Каледонија кои веќе биле на избирачкиот список во 1998 година, како и нивните деца.
Од друга страна, според новата регулатива, сега може да гласаат сите што живееле таму 10 години. Нова Каледонија има 270 000 жители, а со реформата, 50 000 од нив добиваат право на глас.
Во средата навечер францускиот парламент го одобри законот со големо мнозинство. Поддржувачите на прогласувањето на Нова Каледонија независна од Франција стравуваат дека реформата би можела да го ослабне влијанието на првобитното население.
Народната група Канак, составена од домородци на Нова Каледонија, долго време се надеваше на сопствена држава.
Канаците сочинуваат околу 40 отсто од населението. Последните големи немири се случија во 1980-тите.