fbpx
Свет

(ВИДЕО) Немири на универзитети во САД поради војната во Газа

360степени | 1 мај, 2024 15:48

Најжестоки судири меѓу пропалестински и произраелски студенти имало на Универзитетот „Калифорнија“ во Лос Анџелес и на Универзитетот „Колумбија“ во Њујорк

Две различни групи демонстранти, пропалестински и произраелски, денеска се судрија во кампусот на Универзитетот  „Калифорнија“ во Лос Анџелес (UCLA).

По неколкучасовна пресметка меѓу овие две групи, полицијата интервенирала за да ги раздвои групите и да го смири насилството.

Полицијата, исто така, интервенирала и во друг универзитетски кампус во САД за да ги растера пропалестинските демонстранти, кои беа изолирани во зградата на Универзитетот „Колумбија“.

Во полициска акција рано утринава се уапсени најмалку 25 лица, пренесува американската телевизија „АБЦ“ на својот портал.

„Судирите на Универзитетот  „Калифорнија“ се случија околу кампот на пропалестинските демонстранти, кои поставија барикади додека контрадемонстрантите се обидуваа да ги урнат. Дел од демонстрантите фрлаа столови и во еден момент група луѓе нападнаа лице кое лежело на земја, клоцајќи го и удирајќи го со стапови“,

пренесуваат американските медиуми.

Бројот на повредени лица во овие судири се уште не е познат.

Градоначалничката на Лос Анџелес, Карен Бас, насилството го нарече „апсолутно одвратно и неоправдано“ и рече дека полицајците од полициската управа во Лос Анџелес биле на местото на настанот откако им било кажано дека универзитетот побарал полициска помош.

Заменик-комесарот на њујоршката полиција Каз Датри вели дека пропалестинските демонстранти се собрале и на Сити колеџот во Њујорк, а универзитетот им наредил да излезат од кампусот. „Њујорк тајмс“ пренесува дека биле уапсени десетици демонстранти.

©2024 360 степени, Сите права се задржани