„Избори ќе има кога ќе бидат обезбедени услови за фер и демократски избори“, изјави денеска лидерот на опозициската ВМРО-ДПМНЕ, Христијан Мицкоски.
Во изјавата тој вели дека не сака да биде мандатар во време кога се бројат жртви од коронавирусот, одговарајќи на новинарско прашање за изјавата на лидерот на СДСМ Зоран Заев дека е мое да има избори веднаш по укинување на вонредната состојба.
„Задоволен сум што конечно и Заев признава дека не сме сите исти. Има политичари кои што власта не им е приоритет, туку приоритет им е здравјето на граѓаните и има политичари кои што сакаат да го ублажат поразот на следните парламентарни избори кога и да се случат и не водат сметка за здравјето на граѓаните, за економијата и сета онаа криза која што владее во државава и која што е резултат на ковид -19, кој што се случи и кај нас, не останавме надвор од она што се случуваше во светот“,
изјави Мицкоски.
Тој уште еднаш повтори дека во првите три приоритети на ВМРО-ДПМНЕ не се избори.
„Ниту јас сакам бидам мандатар, а ниту ВМРО-ДПМНЕ да биде мандатар, а истовремено да ги брои илјадниците заболени од вирусот и десетиците кои ќе ги изгубат своите животи. Избори ќе се случат тогаш кога ќе има услови за фер и демократски избори. ВМРО-ДПМНЕ ќе победи на тие избори и ВМРО-ДПМНЕ ќе формира влада која ќе ги санира сите последици кои што се резултат на оваа пандемија која што завладеа и тоа не треба да се грижат граѓаните“,
рече Мицкоски.
За тоа како понатаму без избори, вели очекува да се договорат на лидерската средба кај претседателот Пендаровски.
„Очекувам дека помеѓу 10 и 12 мај како што најави претседателот Пендаровски ќе имаме лидерска средба и малку повеќе околу тие детали ќе зборуваме на самата лидерска средба. Навистина жалам што вториот пат кога се продолжи вонредната состојба како ВМРО-ДПМНЕ не бевме консултирани. Навистина жалам што тогаш претседателот ја испушти можноста да каже дека е претседател на сите граѓани, а не да ги подели на тие кои што се од владејачката коалиција и ние кои што сме од опозицијата. Овој пат врз основа на тоа што го рефлектира во јавноста нема да ја повтори истата грешка“,
додаде Мицкоски.
Во врска со поднесената иницијатива до Уставниот суд за оценување на уставноста на одлуката за распуштање на Собранието донесена на 16 февруари, Мицкоски вели дека и во минатото имаше таква иницијатива, но тогаш Уставниот суд ја отфрли како неоснована. За конечен став од партијата побара да се почека одлуката на Уставен.
Вчера телевизијата Телма објави дека судии во Уставниот суд планираат да им предложат на своите колеги да покренат иницијатива по службена должност за укинување на одлуката за распуштање на Собранието бидејќи сметаат дека е беспредметна.
Образложението е дека одлуката за распуштање на парламентот не резултираше со предвремени избори на 12 април.
Лидерот на СДСМ, Зоран Заев, денеска во интервју за „Утрински брифинг“ изјави дека треба да се зграпчи првата можност за одржување на парламентарни избори зашто, како што вели, не се знае кога ќе има втора шанса и ја обвини опозицијата дека сака да избега од изборно соочување.