Од партијата додаваат оти не ја исклучуваат можноста дека станува збор за уфрлени провокатори со намера да предизвикуваат инциденти
Здружението на новинарите на Македонија потсетува дека новинарите имаат својство на службени лица и дека напад кон новинар или медиумски работник при вршење професионални задачи е кривично дело кое се санкционира со казна затвор
Откако Здружениот на новинарите на Македонија (ЗНМ) денеска излезе со осуда за вербалните закани што вчера вечер ѝ биле упатени на новинарка од ТВ 24 и нејзиниот снимател за време на митингот на ВМРО-ДПМНЕ и побара осуда за настанот од партијата, оттаму велат дека посочениот инцидент не бил забележан ниту предизвикан од организаторите на митингот.
Според соопштението на ЗНМ, вчера новинарката на ТВ 24, Елизабета Дамјановска и нејзиниот колега снимател за време на митингот биле вербално нападнати од непознато лице. Тоа првин почнало да ја навредува и омаловажува телевизиската екипа со погрдни зборови и пцости упатени на сметка на сите новинари, што потоа ескалирало во закани кон Дамјановска и снимателот, што кај нив предизвикало чувство на страв и несигурност.
„Здружението на новинарите на Македонија (ЗНМ) го осудува агресивниот однос и вербалните закани кон новинарката Елизабета Дамјановска и нејзиниот колега снимател од ТВ 24, кој се случил за време на вчерашниот партиски митинг на ВМРО-ДПМНЕ пред владата од страна на непознато лице. Бараме од политичката партија ВМРО-ДПМНЕ како и до останатите учесници во изборната кампања, да го осудат нападот кон колегите од ТВ 24 и вакви инциденти да не се повторуваат“,
се вели во реакцијата на ЗНМ.
Оттаму потсетуваат дека новинарите имаат својство на службени лица и дека напад кон новинар или медиумски работник при вршење професионални задачи е кривично делот кое се санкционира со казна затвор.
„Освен ова, укажуваме дека агресивниот говор и говорот на омраза кон новинари може да предизвикаат дела од омраза, со што дополнително може да се загрози безбедноста на новинарите, а со тоа и правото на информирање на граѓаните да примаат информации за важни општествени процеси“,
додаваат од Здружението на новинарите на Македонија.
По реакцијата на ЗНМ, преку писмено соопштение се огласија од ВМРО-ДПМНЕ, од каде што велат дека слободата на медиумите и обезбедување простор за вистинско и точно информирање се врвот на една демократија, но и показател за степенот на демократскиот амбиент во државата.
Од партијата го осудуваат, како што велат, секое спречување на медиумите во нивната работа, со физичко или вербално заплашување на новинарски екипи, а во врска со конкретниот инцидент наведуваат дека тој не бил забележан ниту создаден од лицата кои се организатори на митингот.
Оттаму додаваат оти не ја исклучуваат можноста дека станува збор за уфрлени провокатори со намера да предизвикуваат инциденти.
„Жалиме за навредите кон новинарската екипа на ТВ 24 и го осудуваме однесувањето на поединецот којшто упатил навреди. Истовремено, укажуваме и на атмосферата во која власта, СДС и Ковачевски започнаа хајка против медиуми, и оттука и на можноста за уфрлени провокатори за предизвикување на инцидент на првиот народен собир на ВМРО-ДПМНЕ со импозантна посетеност“,
се вели во соопштението на ВМРО-ДПМНЕ.
Оттаму додаваат дека остануваат на линија на одбрана на професионалните медиумски стандарди и во заштита на медиумските работници во интерес на вистината, на јавноста и во интерес на напредувањето на Македонија.