Според анализата на УНФПА, рестриктивните мерки за коронавирусот може да доведат до 20 проценти повеќе семејно насилство бидејќи жртвите се затворени со своите насилници
Само што почна да се обликува појасна слика за последиците од пандемијата на ковид-19, експертите проценуваат дека цената по човештвото би можела да биде многу голема. Економските нарушувања и физичките ограничувања, предизвикани од болеста, би можеле да имаат големи последици по здравјето и правата на жените и на девојчињата, оценува Агенцијата на ОН за сексуално и репродуктивно здравје (УНФПА) во најновата анализа. Се очекуваат повеќе милиони случаи на родово базирано насилство, на обрежување, на детски бракови, несакана бременост…
Рестриктивните мерки за коронавирусот може да доведат до 20 проценти повеќе семејно насилство бидејќи жртвите се затворени со своите насилници, објави денска ОН, предупредувајќи дека пандемијата може да има „катастрофални последици“ за жените. Десетици милиони жени немаат пристап до контрацепција поради пандемијата, а повеќе од милион девојки би можеле да бидат присилени на брак или обрежување, велат истражувачите.
Според УНФПА, секои три месеци рестриктивни мерки може да резултираат со 15 милиони случаи на семејно насилство повеќе од вообичаеното. Тие проекции ставаат нагласок на она што ОН го нарекува „пандемија во сенка“.

Предвидувањата се дека 44 милиони жени во 114 земји во развој ќе изгубат пристап до контрацепција, што може да доведе до еден милион несакани бремености доколку рестриктивните мерки траат три месеци. Доколку траат шест месеци, бројката ќе се искачи на 7 милиони несакани бремености, според студијата на универзитетот „Џонс Хопкинс“, австралискиот универзитет „Викторија“ и „Авенир здравство.