Борел ги повика сојузниците на Израел, првенствено САД, да престанат да испраќаат оружје

Борел, исто така, остро го критикуваше повикот на израелскиот премиер Бенјамин Нетанјаху повеќе од еден милион Палестинци кои се засолнети во градот Рафах во Газа да бидат евакуирани пред планираната израелска воена операција

Шефот за надворешна политика на ЕУ, Жозеп Борел, ги повика сојузниците на Израел, првенствено САД, да престанат да испраќаат оружје бидејќи „премногу луѓе“ се убиени во Газа.

Коментирајќи ја изјавата на американскиот претседател Џо Бајден минатата недела дека воената акција на Израел е „претерана“, Борел посочи дека е логично да се обезбедува помалку оружје.

Бајден: Воениот одговор на Израел во Појасот Газа беше претеран

„Па, ако мислите дека се убиени премногу луѓе, можеби треба да обезбедите помалку оружје за да спречите толку многу да бидат убиени. Дали (тоа) не е логично? Колку пати сте слушнале како најистакнатите лидери и министри за надворешни работи ширум светот велат дека се убиени премногу луѓе“,

праша тој на прес-конференција во Брисел, заедно со Филип Лазарини, шеф на агенцијата на ОН за палестински бегалци УНРВА, кого Израел го притиска да поднесе оставка.

Борел, исто така, остро го критикуваше повикот на израелскиот премиер Бенјамин Нетанјаху повеќе од еден милион Палестинци кои се засолнети во градот Рафах во Газа да бидат евакуирани пред планираната израелска воена операција.

„Тие ќе се евакуираат – каде? До Месечината? Каде ќе ги евакуираат тие луѓе?“

праша Борел.

Лазарини додаде дека постои „длабоко чувство на паника“ во врска со планираната операција на Израел во Рафах.

„Зборуваме за пет отсто од населението кое е или убиено, или повредено или исчезнато – повеќе од сто илјади луѓе од два милиони население. И ова за само четири месеци. Да ви кажам искрено, немам поим што значи безбедно место во Појасот Газа“,

рече тој.