Системот на рестриктивни мерки на САД за санкционирање на корумпирани политичари е од исклучително значење за борба против корупцијата и ќе помогне во регулирање и реформирање на системот на патот кон ЕУ, порачува првиот вицепремиер за европски прашања Бојан Маричиќ. На панел-дискусија во САД на тема поврзана со односите меѓу САД и Европската Унија, Маричиќ ја истакнал соработката преку стратегијата за поддршка на Западен Балкан базирана на три принципи: јасна агенда, силна поддршка и константно присуство.
„Северна Македонија има воспоставено стратешки дијалог со Соединетите Американски Држави, посебни форми на соработка, каде што системот на рестриктивни мерки на САД за санкционирање на корумпирани политичари на Западниот Балкан е од исклучително значење за борба против корупцијата, и ќе помогне во регулирање и реформирање на системот на патот кон ЕУ. Решавањето на предизвиците како што се корупцијата и промовирањето на интеграцијата се од суштинско значење за постигнување на оваа цел“,
порачал Маричиќ.
Вицепремиерот Маричиќ истакнал и дека присуството и поддршката на американските политичари се од витално значење во борбата против корупцијата на нашиот евроинтергативен пат. Ангажманот и соработката со американските политичари ја зајакнува нашата посветеност на демократските вредности и ги зајакнува трансатлантските партнерства, додава Маричиќ.
„Претстојните европски избори имаат значајно значење во обликувањето на иднината на Европа. Од суштинско значење е да се истакнат прогресивните перспективи на младите генерации кои се залагаат за европско единство и соработка. Исходот од европските и локалните избори во Западен Балкан ќе има големо влијание врз идната траекторија на регионот. Овие избори претставуваат клучни пресвртници во нашето колективно патување кон стабилност и просперитет“,
вели првиот вицепремиер.