Ако се земе во предвид дека договорот за градење на 109 километри автопат во вредност од 1,3 милијарди е со ознака доверливо, како што рече на денешната седница членката на Антикорупциска, Николовска, тоа отвора сомнеж за потенцијална корупција
Државната комисија за спречување на корупцијата (ДКСК) на денешната седница ја презентираше анализата на одлуките при носењето и склучувањето на договорот за градба на коридорите 8 и 10Д со американско-турскиот конзорциум „Бехтел и Енка“ и донесе одлука таа да се достави до Основното јавно обвинителство за гонење на организиран криминал и корупција (ОЈО ГОКК) за нивно понатамошно постапување.
Членот на Антикорупциска, Катица Николовска, посочи дека од доказите кои што ги обезбедиле во текот на постапувањето ги натерало да направат анализа за состојбите и постапувањата на државните органи при носењето одлуки, при носењето на законот и склучувањето на договорот за градба на коридорите 8 и 10Д со „Бехтел и Енка“, пренесува МИА.
„Меморандумот е потпишан, но јавно не е објавен досега. Потоа група пратеници поднесува предлог-закон и по 15 дена се носи во Собранието. Тој се применува како ‘лекс специјалис’ и исклучува примена на други закони. Ваквото постапување на Владата упатува на усогласено постапување и низа активности со цел обезбедување незаконски поволности. Активностите на владини претставници согласно нивните наводи за склучување на договорот, може да се оценат како спротивни на законот за лобирање“,
рече Николовска, пренесува државната новинска агенција.
Ако се земе во предвид дека договорот за градење на 109 километри автопат во вредност од 1,3 милијарди е со ознака доверливо, како што посочи Николовска, тоа отвора сомнеж за потенцијална корупција.
„Договорот што го баравме од Владата со ‘Бехтел и Енка’ по голем број преписки го добивме, но не целосно. Без голем број анекси. Од таа причина не навлеговме во оценка на договорот во целост“,
рече таа.
Николовска, исто така кажа дека постојат индиции за несоодветно и незаконско постапување на одредени лица.
„Во делот на носење на законот немаме што многу да интервенираме. Мојот предлог е да ја усвоиме анализата од постапувањата на државните органи при склучувањето на договорот. Анализата да се достави до ОЈО за нивно понатамошно постапување“,
рече членката на ДКСК.
Анализата на ДКСК, како што беше посочено по нејзиното презентирање покажува дека постојат ризици од корупција, но дека засега нема ништо конкретно и дека надлежните институции треба да продолжат да го следат.
ДКСК отвори предмет за договорот за изградбата на автопатите на коридорите 8 и 10-д по многубројните реакции што тој ги предизвика во јавноста, а беа предмет на анализи и истражувања на медиумите.
Договорот, меѓу другото, повлече и измени на дел од законите. Првично измените ги поднесоа пратеници на владејачкото мнозинство по скратена постапка, но откако тие заглавија во собраниска процедура поради големиот број амандмани од страна на опозицијата, Владата реши да поднесе нов пакет од пет закони – за работни односи, за градење, за експропријација, за урбанистичко планирање и Законот за утврдување јавен интерес и номинирање стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10-д (делница на автопатот Прилеп– Битола) во Република Северна Македонија по скратена постапка, но овој пат со европско знаменце, за да се избегне блокада од опозицијата.
Договорот со американско-турскиот конзорциум „Бехтел и Енка“ беше потпишан во Владата на 8 март 2023.