Организаторот, како што додаваат од МНР, појаснил дека согласно важечките правила, на трибините за време на натпреварите на турнирот дозволено е да се веат само знамиња на учесниците на натпреварот
Ненамерен пропуст, односно техничка грешка била забраната за снимање на државното знаме на Северна Македонија на „Австралија опен“, информира Министерството за надворешни работи.
„По добиените информации за попустот поврзан со истакнувањето на официјалното знаме на Република Северна Македонија на тенискиот турнир ‘Австралија опен’, Министерството за надворешни работи, преку Амбасадата во Канбера, веднаш реагираше до Министерството за надворешни работи и трговија на Австралија, како и до организаторот на турнирот, ‘Австралија опен’. Оттаму добивме уверување дека се работи за ненамерен пропуст – техничка грешка која е веднаш исправена и која не предизвикала ефективни ограничувања. Беше испратено длабоко извинување и уверување дека инцидентот нема да влијае врз силните врски помеѓу граѓаните на Австралија и Северна Македонија, кои се карактеризираат со пријателство и љубов кон спортот“,
се наведува во соопштението на МНР.
Организаторот, како што додаваат од МНР, појаснил дека согласно важечките правила, на трибините за време на натпреварите на турнирот дозволено е да се веат само знамиња на учесниците на натпреварот.
„Воедно добивме и потврда дека за време на учеството на нашата натпреварувачка Илина Ѓорчевска, официјалното знаме на земјава било присутно на трибините меѓу гледачите без никакви ограничувања“,
информира македонското МНР.
Дел од македонските медиуми вчера, повикувајќи се на објави од групи на Македонци во Австралија на социјалните мрежи, информираа дека македонското државно знаме, како и знамето од Кутлеш (Вергина) се забранети за снимање на „Австралија опен“.
Според објавите на Фејсбук, организаторот на турнирот на снимателите од Канал 9, кои ги реализираат преносите од првиот гренслем-турнир во годината, им поделил летоци со знамиња кои не треба да бидат снимани доколку се појават на трибините.
На летокот со инструкции биле знамињата на Палестина, Белорусија, Русија, Тајван, Израел, како и на Македонија. Освен државното знаме на Македонија, забрането било да се снима и знамето со 16-кракото сонце, во неговата црвена и сина (грчка) варијанта.