Како да се продолжи понатаму, Ивановска вели неуморно, со притисоци со препораки и иницијативи до другите институции задолжени за борба против корупцијата. Говорејќи во таа насока, таа ги посочи медиумите како важна алка или, како што рече, „осми член на ДКСК“ во битката за подобрување на состојбите во државата
Претседателката на Државната комисија за спречување на корупцијата (ДКСК), Билјана Ивановска, вели дека е задоволна од сработеното од овој состав на Антикорупциска имајќи ги предвид условите во кои работеле во половина од својот мандат, како и суптилните препреки со кои се соочиле.
Ивановска ова го кажа одговарајќи на новинарски прашања пред денешниот настан на „Транспаренси интернешенл – Македонија“ за презентација на резултатите од Националниот систем на интегритет на Република Северна Македонија.
Прашана дали овој состав на Антикорупциска успеал да ги подигне работите во ова тело од нулта точка, Ивановска рече дека тие не почнале од нула, туку од минус и посочи на извештаите и оценките на Европската комисија за претходните состави на оваа институција кои биле негативни.
„Не од нулта, ние бевме неколку позиции под нула, ако ги земете во предвид оценките коишто Европската комисија ги даваше за оваа институција. Сме правеле анализа за десетина години наназад, до 2019 година навистина беа негативни оценки. Успеавме сето тоа да го поправиме, иако пак ќе кажам половина мандат имавме непроменети услови за работа, како просторни, така и во поглед на материјални, технички и човечки ресурси“,
рече Ивановска.
Сепак, како што посочи таа, низ рацете на ДКСК поминале и биле завршени голем број предмети, некаде околу пет и пол илјади и дале повеќе иницијативи до Јавното обвинителство.
Таа најави дека кон крајот на месецов планираат да организираат брифинг со новинарите на кој ќе ги кажат конечните бројки, бидејќи сè уште имаат тековни предмети.
„…а уште повеќе црешата на шлагот ќе бидат и оние големи предмети кои се однесуваат на „Бехтел и Енка“, на Лотарија итн. така што ќе излеземе со конечни резултати. Јас сум задоволна, имајќи ги предвид условите во кои сме работеле и ресурсите со коишто сме располагале, а и сите оние суптилни препреки со кои се соочувавме“,
вели Ивановска.
Инаку, предметот „Бехтел и Енка“ се однесува на договорот меѓу Владата и американско-турскиот конзорциум кој ќе ги гради автопатските делници од коридорите 8 и 10-д, а кој беше официјализиран со специјален закон донесен во Собранието, кој е таен и во него увид имаат само Основното јавно обвинителство за гонење на организиран криминал и корупција и Антикорупциската комисија.
Државната лотарија се најде во фокусот на јавноста поради сомнителните тендери за избор на фирми за промоција и маркетинг, како и договорот за закуп на деловни простории во објект каде што претходно се наоѓал ресторан за организирање свадби вреден 2,6 милиони евра. Сомнителните зделки се случуваат во период кога на чело на Управниот одбор на Лотарија е Перпарим Бајрами, кој според истражувањата и пишувањата на медиумите бил поранешен вработен во Министерството за политички системи и односи меѓу заедниците на првиот вицепремиер Артан Груби.
Во врска со состојбата со интегритетот на државните институции, Ивановска рече оти ѝ е драго што независните институции како ДКСК и Државниот завод за ревизија (ДЗР), успеваат да ја одржат и да ја зголемат довербата на граѓаните во овие две тела.
„Еве, анкетите покажаа дека во споредба со претходната година Државната комисија има двојно зголемена доверба кај граѓаните и тоа е добро“,
вели претседателката на Антикорупциска.
Како да се продолжи понатаму, Ивановска вели неуморно, со препораки и иницијативи до останатите институции задолжени за борба против корупцијата.
Говорејќи во таа насока, таа ги посочи медиумите како важна алка, или како што рече „осми член на ДКСК, во битката за подобрување на состојбите во државата.
„Како понатаму? Неуморно. Значи мора да се продолжи, мора да се прави притисок и од независните институции коишто со своите препораки или иницијативи се обраќаат до останатите институции, но, исто така, и од вас медиумите како глас на народот, бидејќи буквално јас вас ве чувствувам како осми член на Државната комисија за спречување на корупција. Мораме сите заеднички да правиме притисок. Едноставно професионализмот да дојде до израз. Не гледам поинаков излез од оваа ситуација“,
рече претседателката на ДКСК.
Мандатот на актуелниот состав на ДКСК истекува на 7 февруари, без право на реизбор или продолжување. Новиот состав на Комисијата, кој Собранието го изгласа на 22 декември, треба да почне да функционира на 8 февруари 2024 година.