Покрај осудата за, како што се вели во реакцијата на претседателот, насилничкото однесување од страна на вработени во М-НАВ и други лица кои неовластено влегле во работните простории на Навигацијата, Пендаровски ја поздрави иницијативата на Владата за разрешување на целокупната раководна постава на оваа институција
Ничиј личен или политички интерес не може да биде над правниот поредок и непреченото функционирање на институциите, вели шефот на државата Стево Пендаровски во писмената реакција во која го осудува вчерашниот инцидент во Македонската навигација кога неколку непознати лица упаднаа во објектот на М-НАВ и заедно со вработен во институцијата нападнаа други тројца вработени.
Покрај осудата за, како што се вели во реакцијата, насилничкото однесување од страна на вработени во М-НАВ и други лица кои неовластено влегле во работните простории, Пендаровски ја поздрави иницијативата на Владата за разрешување на целокупната раководна постава на оваа институција.
„Претседателот ја поддржува иницијативата на Владата со која е најавена целосна смена на сите раководни структури во М-НАВ кои се директно одговорни за настанатата состојба во институцијата, а чија работа е од суштинско значење за безбедно одвивање на воздушниот сообраќај“,
пишува во реакцијата на Пендаровски.
Шефот на државата упати поддршка и до Министерството за внатрешни работи (МВР) за целосно расчистување на инцидентот во најкус можен рок, имајќи предвид, како што вели, дека тој се случи во објект кој е дел од најкритичната инфраструктура во државата, а при квалификацијата на прoтивправните дејствија да се земе предвид потенцијалното загрозување на безбедноста во меѓународниот авионски сообраќај.