Во кусата реакција објавена на веб-страницата на Стејт департментот дополнително се наведува дека САД продолжуваат силно да го поддржуваат процесот на проширување на Европската Унија, а со тоа и земјите кандидати и аспиранти за членство во Унијата
Соединетите Американски Држави ја поздравија одлуката на Европската Унија (ЕУ) за отпочнување на пристапните преговори со Украина и Молдавија нарекувајќи ја историска. Одлуката за проширувањето ја оценија како „моќна афирмација на европската иднина на кандидатите и потенцијалните кандидати за членство во Унијата“.
„Одлуките за отворање на преговорите со Украина и Молдавија, доделување кандидатски статус на Грузија и отворање на пристапните преговори со Босна и Херцеговина откако таа ќе ги исполни потребните критериуми, им нуди надеж и поттик на овие земји и нивниот народ да продолжат со реформите кои се потребни и да ги унапредат своите амбиции кон ЕУ. Ова е историски момент за Европа и за трансатлантското партнерство“,
објави американскиот Стејт департмент.
Во кусата реакција објавена на веб-страницата на Стејт департментот дополнително се наведува дека САД продолжуваат силно да го поддржуваат процесот на проширување на Европската Унија, а со тоа и земјите кандидати и аспиранти за членство во Унијата.
„Во овој клучен момент за трансатлантската заедница, ги охрабруваме да го искористат моментумот за да го реализираат својот целосен демократски и економски потенцијал и да ја обезбедат својата иднина во Европа“,
додаваат оттаму.
Одлуката за отпочнување на преговорите со Украина и Молдавија беше донесена од страна на Европскиот совет на вчерашниот Самит на ЕУ во Брисел, откако во ноември годинава Европската комисија за нив препорача отворање на пристапните преговори. Двете земји добија кандидатски статус во јуни 2022 година – годината кога Русија ја започна својата инвазија врз Украина.
Украинскиот претседател Володимир Зеленски ја поздрави одлуката на ЕУ, нарекувајќи ја победничка.