ЕУ и додели кандидатски статус на Грузија, а преговорите со Босна и Херцеговина ќе ги отвори кога ќе се постигне потребното ниво на усогласеност со критериумите за членство
Украина и Молдавија ќе ги почнат пристапните преговори за членство во ЕУ. Ова е одлуката на лидерите на земјите членки на ЕУ, донесена по повеќечасовни разговори, а која на платформата Икс ја објави претседателот на Европскиот совет, Шарл Мишел.
„Европскиот совет одлучи да отвори пристапни преговори со Украина и Молдавија. ЕУ и додели кандидатски статус на Грузија. И ЕУ ќе ги отвори преговорите со Босна и Херцеговина кога ќе се постигне потребното ниво на усогласеност со критериумите за членство и ја повика Комисијата да поднесе извештај до март за да се донесе таква одлука“,
се вели во објавата на Мишел.
The European Council has decided to open accession negotiations with Ukraine & Moldova. #EUCO granted candidate status to Georgia. And the EU will open negotiations with Bosnia and Herzegovina once the necessary degree of compliance with the membership criteria is reached and…
— Charles Michel (@CharlesMichel) December 14, 2023
Според него, ваквите одлуки се јасен сигнал за надеж за народите на овие земји и за европскиот континент.
По објавата на Мишел, на платформата Икс се огласи и украинскиот претседател Володимир Зеленски кој напиша дека ваквата одлука е победа за Украина.
„Ова е победа за Украина. Победа за цела Европа. Победа која мотивира, инспирира и зајакнува“,
напиша тој.
This is a victory for Ukraine. A victory for all of Europe. A victory that motivates, inspires, and strengthens. https://t.co/zk44CeL5Ui
— Volodymyr Zelenskyy / Володимир Зеленський (@ZelenskyyUa) December 14, 2023
За одлуката, на Икс, се огласи и претседателката на Европската Комисија, Урсула фон дер Лајен, која напиша дека ова е стратешка одлука и ден кој ќе остане врежан во историјата на нашата Унија.
„Горди сме што ги исполнивме нашите ветувања и се радувавме за нашите партнери“,
пишува Фон дер Лајен.
Leaders have decided to open accession negotiations with Ukraine and Moldova and to grant candidate status to Georgia.
— Ursula von der Leyen (@vonderleyen) December 14, 2023
A strategic decision and a day that will remain engraved in the history of our Union
Proud that we have lived up to our promises and delighted for our partners
Одлуката за отворање на пристапните преговори со Украина и со Молдавија беше неизвесна до самиот крај бидејќи унгарскиот премиер Виктор Орбан најавуваше дека ќе стави вето.
„Гардијан“ пренесува дека Орбан ја напуштил просторијата кога требало да се гласа за оваа одлука. Британскиот медиум потоа објави дека Орбан во видео обраќање на својот фејсбук-профил рекол дека се уште ја смета одлуката за членство на Украина за лоша, но решил да ги остави другите 26 членки да ја донесат одлуката.