Ирина Сотирова-Бухова вели дека ја поддржува работата на Анкетната комисија и на секој орган кој би придонел до расчистување на случајот, но, како што вели, не може да остане нема на злоупотребата на овој процес „за нелегитимно собирање политички поени и неоснована политичка дискредитација“
Предлог-заклучоците на Анкетната комисија се неиздржани и се одраз на политички реваншизам, реагира ексдиректорката на Државниот санитарен и здравствен инспекторат (ДСЗИ), Ирина Сотирова-Бухова, откако во предлог-заклучоците на претседателката на Комисијата, Рашела Мизрахи, таа се најде меѓу лицата кај кои се лоцира политичката одговорност за случајот „Онкологија“.
Во реакцијата испратена до медиумите, Сотирова-Бухова вели дека ДСЗИ нема никаква законска надлежност во делот на препишување, распоредување на терапијата и контрола на начинот на кој таа се аплицира.
„Во прилог на ова говорат и законските надлежности на инспекторите од ДСЗИ, од каде што е јасно дека инспекторатот не е органот кој е надлежен за преземање на активности и проверки во конкретниот случај. Дополнително, додека јас сум била директор, немало никаква пријава и инспекторатот немал никакви сознанија за евентуални неправилности, за да реагира и ги проследи сознанијата до надлежните институции“,
вели ексдиректорката на ДСЗИ.
Поранешната директорка на Инспекторатот вели дека ја поддржува работата на Анкетната комисија и на секој орган кој би придонел до расчистување на случајот, но, како што вели, не може да остане нема на злоупотребата на овој процес „за нелегитимно собирање политички поени и неоснована политичка дискредитација“.
Реакцијата на Сотирова-Бухова следува откако претседателката на Анкетната комисија за Онкологија, Рашела Мизрахи, вчера во предлог-заклучоците објави неколку имиња кај кои ја лоцира политичката одговорност за овој случај. Освен кај ексдиректорката на ДСЗИ, на листата се најдоа и ексминистерот за здравство Венко Филипче, ексдиректорите на Онкологија, Никола Васев и Нехат Нухи, како и поранешните директори на Фондот за здравство, Стево Крстевски и Фатон Ахмети.
По претставувањето заклучоците од страна на Мизрахи, реагираа пратениците членови на СДСМ, кои истакнаа дека не се согласуваат со овие заклучоци оти, како што рекоа, се заклучоци само од членовите на ВМРО-ДПМНЕ. Посочија дека ќе бараат оставка од Рашела Мизрахи како претседателка на Комисијата.