Високите оценки за секој од 35-темина македонски војници во овие НАТО-сили, рече Петровска, ја оправдуваат довербата што ја добиле од Министерството и Генералштабот и им порача да продолжат да бидат посветени како и досега, да даваат сè од себе, да создадат пријателства и познанства кои ќе траат вечно и да се вратат назад во својата земја, кај своите семејства побогати за едно големо искуство
Секој еден од вас дава свој личен придонес за колективната безбедност и за успехот на Северна Македонија како членка на НАТО, им порача министерката за одбрана Славјанка Петровска на војниците од македонскиот контингент во Мултинационалните сили на НАТО во Романија.
Министерката за одбрана Славјанка Петровска во рамките на официјалната посета на Романија во касарната „Отопени“ ги посети војниците од македонскиот контингент кои се дел од Мултинационалните сили на НАТО сместени во оваа сојузничка земја.
„Ги слушнав оценките на вашите претпоставени дека вашиот ангажман и посветеноста се на навистина највисоко ниво. Заедно со останатите нации, секој ден работите и учествувате во сите вежби и сите активности и давате позитивен пример и вие и колегите од претходната ротација“
рече министерката на средбата со војниците.
Според неа, припадниците на Армијата кои ќе пристигнат со следната ротација ќе имаат сериозен предизвик да остават исто така добар впечаток.
Високите оценки за секој од 35-темина македонски војници во овие НАТО-сили, рече Петровска, ја оправдуваат довербата што ја добиле од Министерството и Генералштабот и им порача да продолжат да бидат посветени како и досега, да даваат сè од себе, да создадат пријателства и познанства кои ќе траат вечно и да се вратат назад во својата земја, кај своите семејства побогати за едно големо искуство.
Петровска во базата „Отопени“ го посети павилјонот каде што се сместени македонските војници, по што беше организиран и ручек со сите припадници на Армијата.
Пред командантот на Мултинационалните сили, бригадниот генерал Константин Николаеску, и членовите на штабот, министерката Петровска се заблагодари за топлиот пречек и за несебичниот придонес на сите НАТО-војници во оваа мисија, што, како што рече таа, е потврда дека НАТО заштитува, обединува и зацврстува.
„Исклучително сум благодарна за силната поддршка која му ја давате на македонскиот контингент. Уверена сум дека секој припадник на Армијата дава свој придонес и дека нераскинливите врски кои ги создадовте ќе траат вечно“,
порача министерката.
Северна Македонија својот придонес во рамки на Мултинационалните сили на НАТО во Романија го започна во ноември 2022 година, со испраќање на единица во јачина од еден вод, односно 35 припадници во рамките на овие НАТО-сили.
Целта на Мултинационалните сили на НАТО во источното крило на Алијансата е да ја зацврстат колективната безбедност и да го демонстрираат единството на земјите членки во заштита на секоја педа сојузничка територија.