Го споделувам вашето мислење дека првата цел што треба да ја имаме е ослободување на сите заложници без никакво двоумење, рекол Макрон на средбата со израелскиот претседател
Францускиот претседател Емануел Макрон денеска е во Тел Авив каде што треба да се сретне со премиерот Бенјамин Нетанјаху, пренесува „Гардијан“.
Освен со Нетанјаху, Макрон се сретнал и со израелскиот претседател Исак Херцог и со опозициските лидери од политичкиот центар Бени Ганц и Јаир Лапид.
Францускиот претседател се очекува да повика на заштита на цивилите во Газа, додека Израел продолжува да бомбардира цели на Хамас во палестинската енклава и се подготвува за копнена офанзива чија цел е уништување на милитантната група која владее во областа.
Макрон пред медиумите рече дека нападот на 7 октомври е огромен шок за целата планета, особено во Франција.
„Го споделувам вашето мислење дека првата цел што треба да ја имаме е ослободување на сите заложници без никакво двоумење. Ќе направиме се што можеме за да ги вратиме мирот, безбедноста и стабилноста за вашата земја и за целиот регион. Тоа што се случи никогаш нема да се заборави, сигурно. И ние ќе бидеме овде денес, утре и задутре за мир и стабилност“,
рекол Макрон на средбата со претседателот на Израел.
Во заеднички медиумски настап со францускиот претседател, Херцог рече дека е загрижен од порастот на антисемитизмот ширум светот, вклучително и во Франција, и рече дека меѓународната заедница треба да преземе цврсти активности.
Израелскиот претседател Исак Херцог го опиша нападот на Хамас на 7 октомври како едно од најлошите злосторства на модерното време.
„Фокусирани сме на уништување на инфраструктурата на Хамас и враќање на нашите граѓани дома. Но, ако Хезболах не вовлече во војна, треба да биде јасно дека Либан ќе ја плати цената“,
рече Херцог.
Претходно Макрон, на аеродромот „Бен Гурион“, во близина на Тел Авив, се сретна со израелско-француските државјани кои ги загубиле своите најблиски, како и со семејствата на заложниците.
Пред Макрон, Израел го посетија и холандскиот премиер Марк Руте, како и американскиот претседател Џо Бајден, германскиот канцелар Олаф Шолц и британскиот премиер Риши Сунак.