„Од политички аспект има едно прашање кое знам дека ќе се злоупотреби, но од безбедносен аспект, да имате премиер којшто ви бил премиер повеќе од 10 години и ги имал сите информации на државата, а е во рацете на друга држава, тоа не е паметно за било која држава“, изјави шефот на дипломатијата во интервју за емисијата „Анализа“ на ТВ 21, притоа одградувајќи се дека нема никаква иницијатива за враќање на експремиерот во земјава
Изјавата на Османи и неговиот став во врска со Груевски веднаш наиде на коментар од лидерот на новоформираната партија Демократско движење, Изет Меџити, кој во изјава за весникот „Лајм“ праша: „Дали Бујар Османи и другите се подготвуваат да го вратат Никола Груевски во Скопје на 23 октомври на Денот на ВМРО?“
Подобро е поранешниот премиер и екслидер на ВМРО-ДПМНЕ, Никола Груевски, да биде во Северна Македонија и да се соочи со правдата, отколку да се наоѓа во друга држава, вели шефот на дипломатијата Бујар Османи во интервју за емисијата „Анализа“ на ТВ 21.
Османи својот став го аргументира од безбедносен аспект, посочувајќи дека станува збор за човек кој повеќе од 10 години бил премиер и ги знае сите информации за државата, а сега е во „рацете на друга држава“, односно во Унгарија, каде што ужива азил откако во 2018 година побегна од земјава.
„Од политички аспект има едно прашање кое знам дека ќе се злоупотреби, но од безбедносен аспект, да имате премиер којшто ви бил премиер повеќе од 10 години и ги имал сите информации на државата, а е во рацете на друга држава, тоа не е паметно за било која држава“,
вели Османи.
Шефот на дипломатијата се оградува и додава дека нема никаква иницијатива за враќање на Груевски во земјава, теза која често се слуша од одредени политички кругови во земјава, особено по донесувањето на контроверзните измени во Кривичниот законик, а во контекст на уставните измени.
„Најдобро е тој да е овде и да се справува со судските процеси коишто ги има. Тоа би било најдобро решение. Затоа ова го кажувам повеќе аналитички, но целата оваа фама околу некаква комуникација е тој психолошки страв кој ние не го разбираме“,
додава министерот за надворешни работи.
Тој во интервјуто се осврнува и на кавгата меѓу актуелниот и поранешниот лидер на ВМРО-ДПМНЕ, која ја почна Мицкоски откако во интервју за германскиот весник „Франкфуртер алгемајне цајтунг“ го обвини својот претходник дека е во тајна комуникација со Владата, со цел да се подели ВМРО-ДПМНЕ за да се протуркаат измените на Уставот. На неговите тврдења со серија објави на Фесјбук возврати Груевски, обвинувајќи го, меѓу другото, Мицкоски за тајна соработка и планови со поранешниот лидер на СДСМ, Зоран Заев.
„Мислам дека темата Груевски е повеќе страв и паника којашто излегува од ВМРО-ДПМНЕ и ни сервира нам дека е некако општествено прашање. Тоа е некаков психолошки немир којшто го имаат, нивни внатрешни односни кои ние не ги знаеме. И тие мислат дека логиката кога вие знаете дека имате еден проблем, мислите дека знаат сите и нас постојано ни го сервираат тој проблем, а ние не сме свесни што се случува. Тоа е немир и паника во опозициската партија кон психолошкиот лик на Груевскки“,
вели Османи во интервјуто за ТВ 21.
Изјавата на Османи и неговиот став во врска со Груевски веднаш наиде на коментар од лидерот на новоформираната партија Демократско движење, Изет Меџити, инаку, поранешен висок функцинер на ДУИ , кој се одвои од партијата со т.н. „огнена група“.
Тој за весникот „Лајм“ вели дека изјавата на Османи е потврда на нивните тврдења дека високи функционери на ДУИ имале комуникација со Груевски во Будимпешта и дека работат на негово враќање во земјава.
„За жал, се потврдуваат нашите сомнежи што ги презентиравме како опозиција на нашите официјални профили, каде јавно прашавме дали Бујар Османи го посетил Никола Груевски во Будимпешта и дали на таа средба бил приватно или службено. Во тој случај одговорите беа дипломатски и неискрени. Иако лично мислев дека ДУИ во 2016 се раздели со режимот на Никола Груевски, за жал Бујар Османи денеска докажа дека тајно одржувале комуникација, си помагале меѓу себе и уште еднаш се докажа дека работат на враќање на Груевски. Затоа го сменија Кривичниот законик, затоа зборуваат за Законот за амнестија, само да биде во функција на враќање на Груевски“,
вели Меџити.
Во тој контекст, тој јавно праша: „Дали Бујар Османи и другите се подготвуваат да го вратат Никола Груевски во Скопје на 23 октомври на Денот на ВМРО?“