Арсовска откри зошто ја разрешила Мазнева: Ниту една позиција не е загарантирана доколку не се реализира програмата на Градот Скопје

Разрешувањето на Мазнева доаѓа три месеци по протестите во „Комунална хигиена“, кога Арсовска ја фалеше дека е храбра жена која им се спротивставува на мафијаши

Ниту една позиција не е загарантирана доколку не се реализира она што е програмска определба на Градот Скопје. Ова денеска го изјави градоначалничката на Скопје, Данела Арсовска, за разрешување на директорката на Јавното претпријатие „Комунална хигиена“-Скопје, Косана Мазнева.

На нејзино место, како в.д. директор, Арсовска го назначи Гоце Трајковски.

„Доколку не се реализира сето тоа што е програмска определба на Градот Скопје, ниту една позиција не е загарантирана, а тоа и го правиме во моментов, даваме шанса на некој за кој веруваме дека во следниот шестмесечен период, доколку се докаже, ќе има шанса да ги реализира нашите програмски определби“,

истакна градоначалничката Данела Арсовска.

Мазнева пред четири месеци потпиша менаџерски договор со Град Скопје.

Вчера за порталот СДК.мк, Мазнева потврди дека е разрешена од функцијата, но не знае зошто.

„Точно е, разрешена сум од функцијата директорка на претпријатието. За причините зошто сум разрешена треба да одговорат надлежните во Градот кои ги носат одлуките. Не станува збор за мое повлекување, ниту сум побарала да заминам од претпријатието. Напротив, цел овој изминат период напорно работев за подобрување на состојбите и условите за работа на работниците“,

изјавила Мазнева.

Разрешувањето на Мазнева доаѓа три месеци по протестите во „Комунална хигиена“, кога Арсовска ја фалеше дека е храбра жена која се спротивставува на мафијаши.

Арсовска ја разреши Мазнева од директорската функција во „Комунална хигиена“ Скопје, таа не знае зошто

„Таа направи нешто што мажи не го направиле 30 години. Тука луѓе не оделе на работа со години, земете направете истражување како новинари. Возеле камиони во Германија, а земале плата. Мора да се расчисти со овие работи и со инфлуенсериве од партиите кои се сликаат низ градот, а 30 години го раководеле ова претпријатие“,

тогаш на висок тон зборуваше Данела Арсовска и рече дека на оваа жена треба да ѝ се каже браво за начинот на кој се справила со претпријатието со 1 400 вработени.

Се справивме со мафијашките структури, ќе работиме 24 часа да го исчистиме Скопје, вели Мазнева

Арсовска ја назначи Мазнева за директорка на „Комунална хигиена“ лани во јули, кога од функцијата го разреши Енуз Кока од Алијанса за Албанците, откако неговиот брат пукаше со пиштол.