Во објавата, „Вашингтон пост“, се повикува на изјава на неименувани американски функционери, од кои едниот вели дека можноста за средба е „мошне силна“ и таа „почнува да се планира“, но дека „се уште не е потврдена“
Следниот месец се планира средба меѓу претседателите на САД и Кина, Џо Бајден и Си Ѓинпинг. Средбата, која ја планираат од Белата куќа, треба да се одржи во Сан Франциско и тоа во време додека двете земји се обидуваат да ги стабилизираат своите односи, објави „Вашингтон пост“.
Во објавата, „Вашингтон пост“, се повикува на изјава на неименувани американски функционери, од кои едниот вели дека можноста за средба е „мошне силна“ и таа „почнува да се планира“, но дека „се уште не е потврдена“.
Плановите за средбата ќе се зацврстат откако кинескиот министер за надворешни работи Ванг Ји ќе дојде во Вашингтон во наредните недели, изјавија претставници на администрацијата.
Состанокот ќе следи по серијата посети на американски официјални претставници на Кина, вклучувајќи ја и онаа на државниот секретар Ентони Блинкен во јуни, министерот за финансии Џенет Јелен во јули и министерката за трговија Џина Раимондо во август.
Неодамна, Блинкен се сретна и со кинескиот потпретседател Хан Женг во Њујорк, а американскиот советник за национална безбедност Џејк Саливан се сретна со кинескиот министер за надворешни работи Ванг Ји во Малта.
„Вашингтон пост“ пренесува дека кинеската амбасада во Вашингтон не одговорила веднаш на прашањето за најавата за средба, а ниту Белата куќа немала коментар.
Бајден и Си последен пат се сретнаа на маргините на самитот на Г-20 во Индонезија во ноември 2022 година, нивна прва средба откако Бајден ја презеде функцијата претседател. Пред тоа тие разговарале пет пати по телефон или преку видео конференција.
Кинеската агенција за безбедност минатиот месец навести дека каква било средба меѓу Си и Бајден ќе зависи од тоа САД „да покажат доволно искреност“.