Во обраќањето од местото на некогашната модуларна болница, семејствата на починатите потенцираа дека граѓаните немаат доверба во правосудниот систем, велејќи дека судството и обвинителството се бранители на корупцијата, организираниот криминал и олигархијата. Освен ново обвинение за случајот, тие побараа и оставки од републичкиот обвинител Љубомир Јовески, главниот обвинител во Тетово, Бесир Алиу, обвинителите Зорица Павловиќ, Дејан Петрески, Ханефи Амети
Со барање за нова истрага и обвинение со кои, како што велат, ќе се докажат вистинските виновници за пожарот во тетовската модуларна болница, денеска семејствата на 14-те лица кои починаа во оваа несреќа, на јавен протест го искажаа незадоволството од првостепената пресуда за случајот.
Протестот се одржа на двегодишнината од пожарот во модуларната болница во Тетово во кој, пред точно две години, на 8 септември 2021 година, живи изгореа 14 лица. Починатите беа главно пациенти кои во тој момент беа на болничко лекување поради ковид-19, а во пожарот загинаа и двајца членови на семејствата на болните.
Денешниот протест започна на местото на кое порано беше поставена модуларната болница од каде што семејствата на починатите имаа обраќања. Порачаа дека додека денеска целата земја го прославува Денот на независноста, тие се собрале за да им оддадат почит на нивните роднини кои пред точно две години ги загубија животите.
„И денес, како и пред две години, сè уште ни се свежи сеќавањата на нивните вресоци и плачот. Беа изгорени пред нашите очи и бевме немоќни да ги спасиме. Тие денес не се меѓу нас само затоа што не се почитувале градежните стандарди. Се обидоа да нè исплашат и замолчат вреднувајќи ги нивните животи со неколку илјади евра, а се обидоа да ги скријат вистинските виновници за оваа трагедија. Сите политичари зборуваат за интеграција во ЕУ, но човечкиот живот не се почитува. Има 14 жртви, нула дена затвор“,
изјави Мумин Исмаили, кој во пожарот на 8 септември 2021 година ги загуби братот и мајката.
Во обраќањето посочија дека бараат правдата да излезе на виделина, посочувајќи дека новинарите на Истражувачката репортерска лабораторија (ИРЛ) во својот документарец за овој случај ги откриле вистинските виновници за пожарот во модуларната болница.
„Од почетокот кажавме дека во оваа држава нема правда. Јас од почетокот бев на судењето, гледав дека нема правда. Беа осудени три лица, не велам дека не се виновни тие, но се гледа кои се виновни. Државата молчи, денес тие слават и не дојдоа кај нас да видат дека 14 лица живи загинаа таму. Ќе бараме нова истрага и ќе продолжиме и понатаму да протестираме“,
додаде Исмаили.
Во обраќањето од местото на некогашната модуларна болница семејствата на починатите потенцираа дека граѓаните немаат доверба во правосудниот систем, велејќи дека судството и обвинителството се бранители на корупцијата, организираниот криминал и олигархијата. Освен ново обвинение за случајот, тие побараа и оставки од републичкиот обвинител Љубомир Јовески, главниот обвинител во Тетово, Бесир Алиу, обвинителите Зорица Павловиќ, Дејан Петрески, Ханефи Амети.
Од местото на некогашната модуларна болница, каде што семејствата на починатите оставаа цвеќе и палеа свеќи, протестниот марш продолжи низ центарот на Тетово, а заврши пред Основниот суд.
Судскиот процес за кривичните дела поврзани со пожарот во тетовската модуларна болница заврши на 5 јуни годинава. Обвинетите директори Флорин Бесими и Артан Етеми за кривичното дело тешки дела против општата сигурност добија казна од една година и шест месеци, со услов во наредните три години да не го повторат делото.
За докторот Бобан Вучевски, пак, кој се товареше за делото непостапување по здравствени прописи, Судот во Тетово донесе ослободителна пресуда.