По преземени оперативно-тактички мерки, утврден е идентитетот на лицето што го сторило кривичното дело – А.М. (21), кој е германски државјанин и против него ќе биде поднесена кривична пријава, информираат од МВР
Дваесет и едногодишниот германски државјанин А.М. е лицето штого вееше знамето со „голема Албанија“ во Тетово за време на пречекот на косовскиот премиер Албин Курти, се вели во денешното соопштение од Министерството за внатрешни работи (МВР). Од МВР велат дека против А.М. ќе биде поднесена кривична пријава по член 319 од Кривичниот законик до надлежното обвинителство за натамошно постапување.
„Одделот за криминалистичка полиција – Сектор за општ и насилен криминал во содејство со СВР Тетово го расчисти кривично-правниот настан што се случи на 11.8.2023 на плоштадот во Тетово при посетата на косовскиот премиер Албин Курти, кога беше развиорено знаме на т.н. ’голема Албанија’, со што е сторено кривично дело по чл. 319 од КЗ. По преземени оперативно-тактички мерки, утврден е идентитетот на лицето што го сторило кривичното дело – А.М. (21), кој е германски државјанин“,
се наведува во соопштението од МВР.
Инаку, косовскиот премиер Албин Курти присуствуваше во Општина Чаир на преименување на улицата „Втора македонска бригада“ во „Адем Демачи“. Во Тетово, пак, беше пречекан со речиси целодневни активности и со настан на градскиот плоштад на кој, меѓу другото, се вееше знаме со картата на т.н. „голема Албанија“. Во Тетово Курти го пречекаа градоначалникот и лидер на движењето Беса, Биљал Касами, претседателот на Алтернатива, Африм Гаши, и претседателот на новоформираното Демократско движење, Изет Меџити.
Седум дена по настанот во Тетово, Министерството за внатрешни работи објави фотографија од лицето што го веело знамето со „голема Албанија“ за време на концертот што на 11 август беше организиран во чест на посетата на косовскиот премиер. Полицијата повика – ако некој го забележи или има информации за лицето, веднаш да извести во најблиската полициска станица.
На настанот во Тетово не беше истакнато националното знаме на државата, а не беше интонирана ниту државната химна. Поради тоа, градоначалникот Билал Касами неколку дена подоцна доби две прекршочни пријави поради непочитување на државните симболи при посетата на косовскиот премиер, а објави и дека до Општината стигнала покана од Основниот суд во Тетово за присуство на рочиште поради сторен прекршок при пречекот на Курти.
Во делот каде што се објаснуваат причините поради кои Судот во Тетово ја поведува постапката, наведено е дека при пречекот на Курти, Општината не постапила согласно Законот за употреба на грбот, знамето и химната на РСМ, односно не ја интонирале државната химна и не го истакнале националното знаме на државата.
Знаме со картата на т.н. „голема Албанија“ во Тетово се вееше и на 25 август, за време на промоција на новоасфалтирана улица во градот од страна на градоначалникот на Тетово, Билал Касами.