Нападот на едно од главните украински пристаништа за извоз на жито се случува неколку часа пред најавената средба меѓу рускиот претседател Владимир Путин и претседателот на Турција, Реџеп Таип Ердоган. Двајцата лидери треба да се сретнат во рускиот град Сочи, на брегот на Црното Море, и да разговараат за одржливоста на Црноморскиот договор за жито под новите услови на Обединетите нации (ОН)
Русија започна серија напади со беспилотни летала на едно од најголемите пристаништа за извоз на жито во Украина, соопштија рано утринава украински власти. Нападот доаѓа на само неколку часа пред најавената средба меѓу рускиот претседател Владимир Путин и неговиот турски колега Реџеп Таип Ердоган на која, според најавите, двајцата лидери ќе разговараат за одржливоста на договор за жито под новите услови на ОН.
Украинските воздухопловни сили рано утринава ги повикаа жителите на пристаништето Измаил, едно од двете главни украински пристаништа за извоз на жито преку Дунав во регионот Одеса, да се засолнат.
Гувернерот на Одеса, Олех Кипер, подоцна објави дека 17 беспилотни летала биле соборени над јужниот регион, но дека нападот предизвикал голема штета на пристанишната инфраструктура.
„Седумнаесет беспилотни летала беа соборени од нашите сили за воздушна одбрана. Но, за жал, има и штети. Во неколку населени места во областа Измаил, оштетени се магацини и производствени згради, земјоделска механизација и опрема на индустриски претпријатија“,
објави гувернерот на Одеса на Телеграм.
Засега нема информации за жртви или повредени во нападот.
Нападот следи по руските нападот на другото големо пристаниште на Дунав – Рени, во кој беше оштетена инфраструктурата на пристаништето и најмалку две лица беа повредени.
Денешниот напад на едно од главните украински пристаништа за извоз на жито се случува неколку часа пред најавената средба меѓу рускиот претседател Владимир Путин и претседателот на Турција, Реџеп Таип Ердоган. Двајцата лидери треба да се сретнат во рускиот град Сочи, на брегот на Црното Море, и да разговараат за одржливоста на Црноморскиот договор за жито под новите услови на Обединетите нации (ОН).