Заврши играчката што се правеше со здравствениот систем, рече премиерот најавувајќи дека за лековите ќе се воведува „трак енд трејс“ систем („следење и трагање“) за кој во минатото имало идеја, но наишло на голем отпор
Криминалот за кој се пишува во медиумите, а поврзан со крадење лекови за пациенти болни од рак на Клиниката за онкологија и нивна препродажба на црниот пазар, премиерот Димитар Ковачевски вели дека е мултипартиски и мултиетнички и затоа порача дека никој нема да биде заштитен, а надлежните ја имаат целосната поддршка за да го истражат.
„Гледам по медиумите, посебно социјалните медиуми, дека се сака да се креира слика за вмешаност само на одредени лица зависно од нивната припадност. Она што можам да го кажам дека ваков тип на криминал е мултипартиски, мултиетнички и мултикултурен и затоа повикувам и МВР и обвинителството непречено да ја извршуваат својата работа, да ги идентификуваат можните сторители врз основа на докази и за тоа ја имаат нашата целосна поддршка од почетокот на акцијата“,
изјави денеска Ковачевски.
Премиерот го повтори и ставот кој претходно СДСМ преку соопштение го изнесе во јавноста, а тоа е дека за вакви злоупотреби се зборува 20 години, но сега е првпат надлежните да спроведат акција за да расчистат со него. Затоа, тој повика да не се прави сензационализам.
„Би сакал да повикам да не се прави сензационализам и напад на сите доктори и медицински сестри во државата бидејќи најголемиот број од медицинскиот персонал кој работи во нашата држава се извонредни луѓе и кадри кои се грижат за здравјето на нашето население. Секој криминал има свое име и презиме, има одговорност и задачата на МВР и обвинителството е да обезбедат докази врз основа на кои ќе бидат идентификувани сторителите, а од страна на претседателот на Владата и од Владата нема да има какви било интервенции во однос на заштита на кого било бидејќи се работи за навистина грозни наводи“,
рече Ковачевски.
Одговарајќи на новинарски прашања, премиерот најави дека за лековите ќе се воведува систем „трак енд трејс“ (Truck&Trace), односно „следење и трагање“, а кој овозможува да се следат стоките од нивниот увоз, па сѐ до крајниот потрошувач.
„30 години во оваа држава никој не зборува за ’трак енд трејс‘ систем, ние немаме таков систем ниту за акцизна стока, ниту за нафтени деривати, ниту за алкохол, ниту за цигари, ниту за лекови. Затоа на следната седница на Владата, Министерството за економија и другите ресори ќе бидат задолжени за акцизната стока да се воведува ’трак енд трејс‘ систем заедно со Царинската управа – да се знае што точно се увезува, со каков квалитет и каде завршува. Второ, имаше идеја и за воведување ’трак енд трејс‘ систем за лековите и имаше отпор. Е нема веќе отпор. Ќе се воведе ’трак енд трејс‘ систем и за лековите, ќе се знае како е увезен лекот, кој го увезол, каде се движи и каде завршува. Заврши играчката што се правеше со здравствениот систем“,
посочи Ковачевски.
Инаку, почнување постапка за воспоставување „трак енд трејс“ систем Владата на Ковачевски најави пред повеќе од шест месеци кога на седница беше усвоена информација за воведување на системот за следење на тутунските производи и на нафтата и нафтените деривати.
*Други поврзани вести:
- ОЈО Скопје и полицијата ја „тресат“ Клиниката за онкологија: Се прибираат докази во рамки на предистражна постапка
- Обвинителство: Одземени се компјутери и друга документација од Клиниката за онкологија и приватни станови во Скопје
- Меџити очекува брза истрага по наводите за злоупотреби на Клиниката за онкологија
- Бесрамен и криминален начин на заработка врз грбот на пациентите, вели заменик-министерката Манолева за случајот со Онкологија
- Лекарската комора за Онкологија: Ниту еден пациент не заслужува злоупотреба на терапијата за лична корист
- ВМРО-ДПМНЕ: Бизнисот со лекови на Онкологија бил возможен само со знаење на високи структури во клиниката и во власта