Според Мицкоски, секој министер во ДУИ си има своја фирма, а таков е, како што рече, и овој случај каде што фирма која претходно се легитимирала како донатор на ДУИ добива тендер, а со тој тендер треба да направи одредени градежни зафати во СЦ „Борис Трајковски“. Со тоа, според Мицкоски, практично се легитимира и организаторот, а тоа е Бујар Османи, кој е во својство на министер за надворешни работи
Секој министер во ДУИ си има своја фирма. И секој министер преку таа фирма ги краде граѓаните во тендери во четири очи. Ова е дел од коментарот на лидерот на ВМРО-ДПМНЕ, Христијан Мицкоски, одговарајќи на новинарско прашање по информацијата дека Министерството за надворешни работи (МНР) префрлила пари на внукот на поранешниот министер од ДУИ и донатор на партијата за организирање настан.
Според Мицкоски, таков е и овој случај каде што фирма која претходно се легитимирала како донатор на ДУИ добива тендер, а со тој тендер треба да направи одредени градежни зафати во СЦ „Борис Трајковски“, каде што на крајот на декември ќе се одржи Самитот на претседатели на држави на земјите членки од ОБСЕ.
„Со тоа практично се легитимира и организаторот, а тоа е Бујар Османи, кој е во својство на министер за надворешни работи, бидејќи Ковачевски никој во суштина не го прашал. Него само му кажуваат, ти ќе бидеш денеска уште еден ден повеќе премиер, другото остави го и така не те бива за таа работа, еве тука ти се ресурсите, те возат лево-десно, те викаат премиер уште малку, другото си е наша работа. Така што, него никој ништо не го прашува. Бујар Османи си има своја фирма, си ја ангажира таа фирма. Таа фирма е донатор на ДУИ за градежни зафати во СЦ ‘Борис Трајковски’“,
рече Мицкоски при денешната посета на Берово.
Мицкоски нагласи дека за ова по промената на власта ќе следи одговорност и дека секој кој се огрешил пред законот, ќе одговара, а секој кој што мисли дека ќе се спаси, како што рече, тој се лаже.
„Сакам да кажам дека веднаш по промената на владата ќе следи и одговорност. Ако некој мисли дека тукутака ќе се спаси и дека ДУИ и понатаму и овие фирми блиски до ДУИ ќе бидат заштитени како досега, се лажат. Сега малку повеќе се преиграа и за ова ќе следи одговорност“,
рече Мицкоски.
Фирмата „Еуровиа“ од тетовско Желино, чиј извршен директор е Елмедин Адеми – роднина на поранешниот министер од редовите на ДУИ, Абдилаќим Адеми, е избрана меѓу четирите компании што се пријавиле на тендерот за адаптација на СЦ „Борис Трајковски“, каде што во декември ќе се одржи министерска конференција на ОБСЕ.
Коментирајќи ги објавите во медиумите дека токму фирма блиска до ДУИ ја добива јавната набавка тешка околу 1,8 милиони евра, Министерството за надворешни работи вчера преку соопштение објави дека избраната компанија понудила најниска цена од сите што се пријавиле на тендерот.
Во соопштението на Министерството се додава дека постапката е изведена согласно Законот за јавни набавки и со почитување на начелата на економичност, ефикасност и ефективност на користењето на јавните средства, како и обезбедување конкуренција и транспарентност и еднаков третман на економските оператори.
Оттаму рекоа дека „најголемиот меѓународен политички настан што некогаш се одржал во земјава“ ќе биде едно од најнискобуџетните претседавања во поновата историја на ОБСЕ, а ќе се вброи во претседавањата со огромен број активности и настани.