Лицата кои се ангажирани како хонорарци во државните институции ќе добиваат цел хонорар доколку се невработени, додека оние кои се вработени, а се ангажирани хонорарно во институција ќе земаат половина од хонорарот.
Ова е регулирано со Уредба со законска сила која е донесена на денешната владина седница.
„Се утврдува дека на овие лица им се исплаќа целосен паричен надомест, за време на траењето на вонредната состојба, како и по престанокот на траењето на вонредната состојба до 31 декември 2020 година, доколку лицето со денот на влегувањето во сила на оваа Уредба не е евидентирано како пријавено вработено лице во Агенцијата за вработување“,
велат од Владата.
За оние кои се вработени, а се ангажирани хонорарно во државна институција, ќе им се исплаќа половина сума од хонорарот, но не повисока од 30 000 денари.
Ова се однесува на сите хонорарци ангажирани во: органите на државната власт (законодавна, извршна и судска), регулаторните тела, агенциите, државните комисии, правните лица во целосна или доминантна државна сопственот, единиците на локалната самоуправа и градот Скопје и правните лица основани од единиците на локалната самоуправа и градот Скопје.
Исклучот од Уредбата се хонорарците кои се ангажирани на проекти финансирани или кофинансирани со заеми од странски кредитори, од меѓународни донатори и финансиери.