Со одлуката да го празнува големиот христијански празник на 25 декември, Украина ја напушта групата од десетина земји во кои православните цркви го одбележуваат Божиќ на 7 јануари според стариот црковен календар – јулијанскиот, меѓу кои е и Северна Македонија
Украина реши да го помести Божиќ и отсега наместо на 7 јануари ќе го слави на 25 декември – потег што се толкува дека е направен за дистанцирање од Русија.
Претседателот Володимир Зеленски го потпиша законот откако пред две недели беше усвоен во парламентот, а неговата цел е „да се напушти руското наследство на наметнатите божиќни прослави“.
Покрај Божиќ, со истиот закон се поместуваат и одбележувањето на Денот на украинската државност – од 28 јули на 15 јули, како и Денот на бранителите кој се одбележува во сеќавање на ветераните на вооружените сили – од 14 на 1 октомври.
Со поместувањето на Божиќ, се смета дека Украина сака да се дистанцира и од влијанието на моќната Руска православна црква, која имаше авторитет над украинската. Меѓутоа, во 2019 година православната црква на Украина доби автокефалност од Вселенскиот патријарх Вартоломеј.
Со одлуката да го празнува големиот христијански празник на 25 декември, Украина ја напушта групата од десетина земји во кои православните цркви го одбележуваат Божиќ на 7 јануари, меѓу кои е и Северна Македонија.
На 7 јануари Божиќ се празнува според стариот црковен календар – јулијанскиот, додека на 25 декември е според грегоријанскиот. Меѓу православните цркви од нашето опкружување кои го слават Божиќ според грегоријанскиот календар се и бугарската и грчката.