Пораката од Ескобар е да ја задржиме амбицијата за членство во ЕУ, со укажување дека за успех е потребен политички консензус и продолжување со спроведување на бараните реформи во наредните месеци, информираат од СЕП
Уставните измени, евроинтеграциите и поддршката од САД на тој план, како и процесот на реформирање на нашето општество, се темите на кои разговарале вицепремиерот за европски прашања Бојан Маричиќ и Габриел Ескобар, американскиот специјален претставник за Западен Балкан и заменик помошник државен секретар за Европа и Евро-Азија на нивнаат средба во Вашингтон.
Од Секретаријатот за европски прашања (СЕП) велат дека Маричиќ ја искористи средбата за да го информира Ескобар за текот на преговорите со ЕУ посочувајќи дека Владата ќе продолжи со офанзивна политика кога станува збор за интегрирањето на државата во ЕУ, за задржување на динамиката на преговорите и брз напредок во процесот.
„Пораката од Ескобар е да ја задржиме амбицијата за членство во ЕУ, со укажување дека за успех е потребен политички консензус и продолжување со спроведување на бараните реформи во наредните месеци“,
се наведува во соопштението.
На средбата, како што информираат од СЕП, било потврдено дека ова е добар момент за цел Западен Балкан, особено за Северна Македонија која ги исполнува условите и веќе преговара со ЕУ, да потврди дека е сериозна кандидатка за членство во Унијата и да направи брз исчекор, со кој ќе ја потврди својата позицијата во новиот пакет на проширување на ЕУ.
Маричиќ и Ескобар, се додава во соопштението, се согласиле дека можеме да успееме и дека имаме целосна поддршка од САД во тоа.
Маричиќ, исто така, се заблагодарил за поддршката која САД ја дава на Северна Македонија и што останува силна политичка и економска помош во реализацијата на нашата стратешка определба.