Американскиот претседател Џо Бајден денеска се сретна со британскиот премиер Риши Сунак, а меѓу главните теми на разговор беше одлуката на САД да испрати касетни бомби во Украина, пренесува Би-би-си. На средбата Сунак порачал дека САД и Обединетото Кралство се двата најцврсти сојузници во НАТО, а во краткото видео на кое двајцата лидери пијат чај, претседателот Бајден вели дека односите меѓу двете земји се цврсти како карпа.
Повикувајќи се на изјава на портпаролот на Сунак, британските медиуми пишуваат дека премиерот останал на ставот дека ова оружје е контроверзно за Обединетото Кралство, како една од сто земји потписнички на Конвенцијата со која се забранува употребата на касетна муниција. Сепак, портпаролот потенцира дека тоа е тешка одлука за САД на која се присилени поради руската агресивна војна. Од друга страна, Бајден потенцира дека има гаранции од Украина дека оружјето нема да се користи против цивили и во урбани средини.
Во рамките на посетата на Лондон, Бајден се сретна и со кралот Чарлс, првпат по неговото крунисување.
Двајцата лидери се сретнаа во замокот Виндзор, каде што Бајден беше пречекан со официјална церемонија, а потоа учествуваа на тркалезна маса за климатските промени, на која присуствуваа претставници од добротворни организации и од финансискиот сектор.