Според ВМРО-ДПМНЕ, повеќе нема ништо на маса меѓу неговата партија и власта, во контекст на уставните измени. Единствено за што може да се договараме, додаде тој, се брзи предвремени парламентарни избори
Претседателот на ВМРО-ДПМНЕ, Христијан Мицкоски, денеска во Штип изјави дека Извршниот комитет на партијата донел одлука за прекин на секоја комуникација со Владата, на „билатерално ниво“. Не објасни во детали што значи тоа, но од изјавата може само да се претпостави дека Мицкоски одбива потенцијални идни средби со премиерот Димитар Ковачевски, а останува на маса во пошироки формати – како на пример, лидерски средби на повеќе партии.
Ова е целата изјава на Мицкоски, прашан дали има комуникација со власта.
„Комуникација со власта немаме. Оваа недела имавме седница на Извршниот комитет на партијата и донесовме едногласна одлука дека како ВМРО-ДПМНЕ ги прекинуваме сите комуникации официјални, на билатерално ниво, со претставници на Владата. Така што, повеќе како ВМРО-ДПМНЕ и коалицијата нема да се среќаваме на билатерална основа официјално со претставници од Владата“,
изјави Мицкоски.
Од Мицкоски, сепак, не беше побарано појаснување – што се подразбира под „официјални“ средби и дали ќе продолжи комуникацијата на средби кои би се означиле како неофицијални.
Ставот за прекин на „билатералната официјална комуникација“, Мицкоски го искажа по прашањата за најавите од власта дека предлогот за уставните измени ќе биде испратен до Собранието во следните две недели. За разлика од реториката по последната средба со премиерот Димитар Ковачевски која остави простор за некаков компромис по прашањето, Мицкоски денеска отфрли можност за постоење на каков било пат за носење на уставните измени.
„Има пат за брзи предвремени парламентарни избори оваа есен. На тој начин ќе ги спасиме граѓаните од дополнителни, како да кажам, срамови и предавства кои Бојан Марачиќ и останатите како него ги носат. Јас го разбирам и Маричиќ и Ковачевски и Зечевиќ, апсолутно можам да ги разберам. Тие луѓе немаат легитимитет од народот, не се бирани од народот и за нив секој ден значи тендер повеќе, привилегија повеќе“,
изјави Мицкоски.
Според Мицкоски, ВМРО-ДПМНЕ се обиделе да бидат конструктивни во процесот. Но, посредно, кажа дека ништо од тоа не било прифатено.
„Во меѓувреме, на неколку наврати, дури еднаш и овде од Штип, нели се сеќавате на оној хрватски модел за Преамбулата во Уставот, беше предложен и ставен на маса. Имаа многу можности за национален консензус и да излеземе од оваа состојба во која се наоѓаме. После една година можам да кажам и на Ковачевски и на Османи и на Маричиќ и на останатите – повеќе нема ништо на маса. Повеќе нема ништо на маса, има само една работа. А тоа е да седнеме и да се договориме околу изборите. Кога ќе бидат изборите, како ќе бидат изборите, на кој начин, со техничка влада, немање техничка влада“,
изјави Мицкоски.