Ваквата информација ја објави Македонското археолошко научно друштво во објава на својата официјална фејсбук-страница. Колегите на починатата Ленче Јованова (66) се простуваат од, како што велат, врвен и искусен професионалец кој со огромна посветеност го промовираше македонското културно наследство во земјава и светот
Шеесет и шестгодишната жена која пред неколку дена почина по удар од багер во центарот на Скопје е Ленче Јованова – долгогодишен член на Македонското археолошко друштво и кустос-советник во Музеј на Град Скопје.
Фото: Македонско археолошко научно друштво
Ваквата информација ја објави Македонското археолошко научно друштво во објава на својата официјална фејсбук-страница. Колегите на Јованова се простуваат од, како што велат, врвен и искусен професионалец кој со огромна посветеност го промовираше македонското културно наследство во земјава и светот.
„Со големо неверување ја примивме веста дека нашата колешка Ленче Јованова во немил настан на 66-годишна возраст го загуби својот живот“,
стои во објавата на Македонското археолошко научно друштво.
Јованова (1957-2023), додаваат оттаму, остави длабок и неизбришлив траг во македонската археологија, истражувајќи ги културните хоризонти на античкиот град Скупи.
„Автор е на многубројни изложби, каталози, статии, студии, а особено се значајни монографиските изданија Скупи – Colonia Flavia Scupinorum; Скупи – некрополи : стории за истакнати личности според епиграфски и археолошки сведоштва; Скупи: сектор југоисточен бедем и комплекс терма – базилика со атриум“,
додаваат од Археолошкото научно друштво.
Шеесет и шестгодишната скопјанка беше удрена од багер во центарот на Скопје во саботата, по што почина на самото место, подлегнувајќи им на повредите. Несреќата се случи на улицата „Јордан Мијалков“ откако 42-годишен маж со иницијали И.А., кој управувал со градежната машина, удрил во Јованова на означен пешачки премин.
По несреќата, Основното јавно обвинителство (ОЈО) Скопје поведе истрага против 42-годишникот. Тој, како што соопштија оттаму, е осомничен дека сторил тешко дело против безбедноста на луѓето и имотот во сообраќајот кое е казниво согласно Кривичниот законик.
Поради текот на истрагата, Обвинителството до Судот поднесе предлог за определување мерки на претпазливост за осомничениот, меѓу кои забрана за напуштање на живеалиштето, одземање на патната исправа и возачката дозвола и привремена забрана за извршување работни активности кои се поврзани со кривичното дело.