Пораката од Брисел е дека не може да водиме политика базирана на двојни стандарди, односно од една страна да им е полна устата за европска иднина, а од друга страна да има криминал, рече лидерот на ВМРО-ДПМНЕ од Брисел обвинувајќи ја власта на СДСМ и ДУИ за криминалот и корупцијата во земјава
Лидерот на ВМРО-ДПМНЕ, Христијан Мицкоски, и двајцата потпретседатели на партијата, Тимчо Муцунски и Александар Николоски, кои се дел од партиската делегација во Брисел, се консултирале со претставници од Европскиот парламент за можните решенија кои идната влада на ВМРО-ДПМНЕ треба да ги преземе во насока на решавање на проблемите со кои се соочува државата.
Ова за ТВ Алфа денеска од Брисел го изјави партискиот лидер, велејќи дека тема на разговор со претставниците на ЕУ била актуелната ситуација во Македонија во поглед на корупцијата и криминалот, но и состојбата во која се наоѓа образованието, здравството и земјоделството.
„Се консултиравме со високите претставници на ЕУ, со луѓето од Европскиот парламент за можните решенија кои идната влада на ВМРО-ДПМНЕ треба да ги преземе во насока на решавање на овие реални проблеми. Посебен фокус ставивме на високото ниво на корупција и криминал во државата и како да владее правото“,
кажа Мицкоски.
За корупцијата и криминалот во земјава, Мицкоски ја обвини власта на СДСМ и ДУИ, велејќи дека е неприфатливо земја кандидат за членство во ЕУ истовремено да биде лидер по перцепција на криминал и корупција и да промовира европски вредности, како што прави актуелната влада.
„Пораката од Брисел е дека не може да водиме политика базирана на двојни стандарди, односно од една страна да им е полна устата за европска иднина, а од друга страна да има криминал“,
додаде претседателот на ВМРО-ДПМНЕ.
Решение за што побрзо искоренување на криминалот и намалување на перцепцијата на корупција, рече Мицкоски, се предвремени парламентарни избори.
За време на средбите во Брисел, делегацијата на ВМРО-ДПМНЕ која ја предводи Мицкоски, го повторила ставот на партијата оти нема да прифати уставни измени под бугарски диктат.