Американската амбасадорка порача дека на членството во ЕУ, земјава треба да гледа низ истата призма како за членството во НАТО
САД ќе продолжат да инвестираат и да ја поддржуваат Северна Македонија, но следниот чекор, кој ќе ја однесе вашата земја кон посветла иднина, не можеме да го направиме наместо вас – за тоа ви е потребна политичка волја.
Ова на конференцијата „Односите на САД и Северна Македонија во ера на геополитички превирања“ денеска го изјави американската амбасадорка во земјава Анџела Агелер, која ја искористи можноста и им порача на државните и политичките челници во земјава да најдат начин и да ја насочат државата во вистински правец.
„Водството на С Македонија мора да пронајде начин да го фати вистински правец, дури и пред формално да влезете во ЕУ. САД ќе ве поддржат, ќе продолжиме да инвестираме во вас, но ова не можеме да го направиме наместо вас. Во секоја држава за одредени важни одлуки потребно е власта и опозицијата да работат заедно, да ја тргнат настрана политиката и да го сторат она што е добро за граѓаните. Во сржта на тешките одлуки, кои треба да се донесат, се всушност вашите граѓани“,
порача американската амбасадорка.
Таа порача оти на членството во ЕУ, земјава треба да гледа низ истата призма како за членството во НАТО.
„Кога домашните предизвици постојано доминираат во насловите, лесно може од вид да ја изгубите поголемата слика, а за оваа земја тоа значи да биде дел од недвосмислено најголемиот светски економски блок“,
додаде Агелер.
Таа истакна дека турбуленциите во светски рамки изминатиот период покажале оти изолацијата не е опција, нагласувајќи дека членството во ЕУ на земјава ќе ѝ овозможи подобро да се справи со домашните предизвици, како иселувањето на младите. Членството, додаде таа, може да помогне во спречувањето на тој тренд, а тоа исто така ќе донесе економски можности, креирање нови работни места, образовни можности.
Таа во обраќањето се осврна и на американско-македонските односи, нагласувајќи оти партнерството меѓу САД и Северна Македонија е толку силно, што може, како што рече, да ја надмине секоја бура.
„За САД, Северена Македонија постојано била бастион на стабилноста. За само три години како НАТО-членка, С Македонија ја покажа својата сила и вредност како глобален безбедносен партнер. Во само три години вашата земја истапи и цврсто застана на вистинската страна на историјата, најпрво со кризата во Авганистан и сега со руската неиспровоцирана, немилосрдна и брутална инвазија на Украина. Не потценувајте го значењето на она што го стори вашата земја и не потценувајте го значењето на она што значи да се биде дел од Алијанса како НАТО“,
рече Агелер.