Корупцијата мора да има последици, но определбите нон грата не се доволни, додаваат од партијата
Алијанса за Албанците (АА) го поздравува прогласувањето нон грата на Рамиз Мерко од страна на САД и интензивирањето на борбата против корупцијата, соопштија од партијата на Арбен Таравари, владин партнер на СДСМ и ДУИ.
„Две години откако претседателот Џо Бајден ја потпиша извршната наредба за проширување на американските санкции за да ја вклучи корупцијата како причина, Стејт департментот денеска го прогласи за нон грата Рамиз Мерко, градоначалник на Општина Струга и член на Претседателството на ДУИ. Според Стејт департментот, Мерко учествувал во значителна корупција, присвојувајќи средства на нелегален начин и мешање во судски и други јавни постапки. Како резултат на тоа, нему и на неговото потесно семејство им е забранет влез во САД. Оваа денешна определба е сигнал кој има потенцијал да ја врати надежта во Северна Македонија. Од денес САД докажаа дека никој не е недопирлив. Ѝ честитаме на амбасадорката Агелер за нејзината доследност и предупредувањето дека ќе има други определби во текот на оваа година“,
соопштија од АА.
Корупцијата мора да има последици, но определбите нон грата не се доволни, додаваат оттаму.
„Рамиз Мерко веднаш да поднесе оставка, а ДУИ да се огради од својот член на Претседателството. Обвинителството за корупција треба да отвори случај против Мерко за да обезбеди целосна одговорност за наводите на американскиот Стејт департмент и за да ја спроведат правдата“,
повикаа од партијата на Таравари.