Испраќањето официјална покана е првиот чекор во процесот на приклучување кон Северноатлантскиот договор. Столтенберг додаде дека лидерите на Алијансата ќе разговараат како Украина да се приближи до НАТО
Лидерите на НАТО нема официјално да ја поканат Украина да се приклучи на Алијансата на самитот во Вилнус во средината на јули, изјави генералниот секретар на НАТО, Јенс Столтенберг.
„На самитот во Вилнус и во подготовките за самитот не разговараме за прашањето за официјална покана“,
изјави Столтенберг за новинарите по средбата со германскиот канцелар Олаф Шолц во Берлин.
Испраќањето официјална покана е првиот чекор во процесот на приклучување кон Северноатлантскиот договор. Столтенберг додаде дека лидерите на Алијансата ќе разговараат како Украина да се приближи до НАТО. Тој, исто така, предупреди да не се прифати замрзнатиот конфликт во Украина во замена за прекин на војната.
„Сите сакаме оваа војна да заврши, но праведен мир не може да значи замрзнување на конфликтот и прифаќање на договор диктиран од Русија“,
рече тој.
Столтенберг се осврна и на ситуацијата во Косово, повикувајќи ги сите страни да престанат со секоја понатамошна ескалација и веднаш да се вратат на дијалогот што го води ЕУ.
„Нашите сили, КФОР, ќе продолжат да ги преземаат сите неопходни мерки за да гарантираат безбедна средина“,
додаде тој.
Високиот претставник за надворешна и безбедносна политика на ЕУ ги покани српскиот претседател Александар Вучиќ и косовскиот премиер Албин Курти на кризна средба во Брисел следната недела. Сепак, ниту еден од нив не потврди дека ќе одговори на поканата.