Оперативно-техничката агенција во соодветна постапка и со вклученост на сите институции надлежни за спроведување на процесот за следење на комуникациите, со одобрени средства за конкретна намена од страна на Владата има поднесено барање за одобрение и техничка спецификација, за што има добиено и поседува позитивно мислење и одобрување од страна на Министерството за внатрешни работи, се вели во реакцијата од ОТА
Оперативно-техничката агенција (OTA) најодговорно и во целост ги негира изјавата и дезинформациите изнесени од страна на Бране Петрушевски на денешната прес-конференција во Собранието на Република Северна Македонија, се вели во писмената реакција од ОТА и додаваат дека македонската јавност треба да биде спокојна и да не подлегнува на политички мотивирани изјави дадени во особено сензитивни околности, со кои ОТА и нејзиното работење немаат никаква поврзаност.
Од ОТА додаваат дека Агенцијата не го прекршила членот 2 од Законот за следење на комуникациите и дека на кој било начин се преземаат чекори за нарушување на националната безбедност.
Напротив, велат од ОТА, во соодветна постапка и со вклученост на сите институции надлежни за спроведување на процесот за следење на комуникациите, со одобрени средства за конкретна намена од страна на Владата на Република Северна Македонија и во согласност со членот 2 од Законот за следење на комуникации има поднесено барање за одобрение и техничка спецификација, за што има добиено и поседува позитивно мислење и одобрување од страна на Министерството за внатрешни работи, се додава во соопштението.
„Оперативно-техничката од своето формирање како самостоен и независен државен орган е истакнат застапник на доследното спроведување на законитоста, надзорот и контролата над спроведувањето на мерките за следење на комуникациите залагајќи се за редовни, континуирани и суштински надзор и контрола, со чие доследно спроведување од страна на сите чинители работиме во насока да ја вратиме довербата на јавноста во овој дел од безбедносниот сектор, што го сметаме за стратешка, системска и заедничка, општествена заложба која ги надраснува било каквите поединечни и/или групни интереси“,
додават од ОТА.
Пратеникот на ВМРО-ДПМНЕ, Бране Петрушевски, денеска објави дека Оперативно-техничката агенција (ОТА) извршила набавка на средства кои можат да бидат злоупотребени за незаконско следење на комуникациите на граѓаните и оти постои основано сомневање дека се преземаат чекори за нарушување на националната безбедност отворајќи врата за злоупотреба на механизмите за следење на комуникациите на над 2 милиони граѓани.