Доколку вработените во Царината не наидат на слух од надлежните институции во врска со нивните барања за исплата на додаток на плата, тие ќе ги радикализираат протестите, а една од опциите за кои веќе размислуваат е затворање на граничните премини
Вработените во Царинската управа не ги интересира кој е нов, а кој стар директор – тие в петок ќе излезат на предупредувачки протест бидејќи со години наназад не го добиваат она што им следува согласно закон и Колективниот договор, а тоа е исплата на додаток од 30 отсто од платата.
Ова на прес-конференција денеска го изјави претседателот на Синдикатот на УПОЗ, Трпе Деаноски, најавувајќи го претстојниот предупредувачки протест на вработените во оваа институција.
„Видовме дека министерот за финансии си обезбеди 30 проценти покачување на плати во МФ и во други институции, меѓутоа иако вработените во Царина имаат право на овој додаток, никогаш не го добивале“,
рече Деаноски на денешната прес-конференција.
Деаноски нагласи дека вработените во Царинската управа го полнат државниот буџет со повеќе од 51 отсто секоја година, а за тоа, како што додаде, не добиваат никакво покачување на платите со години, ниту, пак, го добиваат додатокот на плата кој им следува.
„Знаеме дека има нов директор, чекаме да дојде. Чекаме прием кај него за да видиме дали ќе ги сослуша нашите барања бидејќи тие не се нови и не се откажуваме од нив. Не нè интересира дали имаме нов или стар директор“,
додаде првиот човек на Синдикатот на УПОЗ.
Доколку цариниците не наидат на слух од надлежните институции во врска со нивните барања, тие ќе ги радикализираат протестите, а една од опциите за кои веќе размислуваат е затворање на граничните премини.
Протестот на цариниците, предупреди Деаноски, е прв во низата протести што ќе следуваат во наредниот период во други институции и со што ќе се реализира, како што рече, најавуваното жешко синдикално лето.