Нашата преговарачка рамка одобрена од 27-те земји членки на ЕУ експлицитно го условува отворањето на преговорите со усвојување на уставните измени. Значи, прво усвојување на уставните измени, а потоа отворање на преговорите
Условот на македонската опозиција за суспензивни уставни измени е неостварлив бидејќи е во спротивност со преговарачката рамка на Европската Унија, оцени денеска лидерот на политичката партија Алијанса за Албанците (АА) Арбен Таравари на прес-конференција по повод средбата и разговорите што ги водат премиерот Димитар Ковачевски и претседателот на ВМРО-ДПМНЕ, Христијан Мицкоски.
Според него, измените на Уставот треба да стапат во сила најдоцна до моментот на одржување на втората меѓувладина конференција.
Конечниот став на АА, нагласи Таравари, ќе биде познат до крајот на неделата, кога ќе се состане партиското раководство. Тој смета дека размената меѓу двете најголеми македонски партии со понуди и контрапонуди за гласање на уставните промени, директно влијае и на интересот на Албанците.
„Алијансата за Албанците внимателно ја анализира новонастанатата состојба и до крајот на неделата ќе одржиме состанок на раководството на партијата по што ќе излеземе со усогласен став во партиските органи“,
рече Таравари.
Тој ја поздрави волјата на опозицијата да гласа за измените и оцени дека поставените услови се конфузни и надвор од реалност.
„Нашата преговарачка рамка одобрена од 27-те земји членки на ЕУ експлицитно го условува отворањето на преговорите со усвојување на уставните измени. Значи, прво усвојување на уставните измени, а потоа отворање на преговорите“,
потенцира Таравари.
Во однос на условот на ВМРО-ДПМНЕ за излез на албански партии од владата, лидерот на Алијанса напомена дека на АА и се поважни интересот за завршување на европскиот процес и перспективата на граѓаните, а не изборните калкулации на некоја политичка партија.
„Алијансата за Албанците реши да влезе во Владата заради процесот, но ќе се адаптира во зависност од новите околности, дали во Владата или надвор од неа. За нас е важно само завршувањето на процесот и ќе дадеме свој придонес, без услови и без уцени“,
рече Таравари.
Гостиварскиот градоначалник и лидер на Алијанса за Албанците напомена дека една од главните цели во дејствувањето биде нивното барање за отстранување на 20 проценти кои го негираат албанскиот идентитет и воведување на албанскиот јазик во Уставот, нагласувајќи дека е дојден момент за таа промена.
Лидерот на ВМРО-ДПМНЕ, Христијан Мицкоски, во неколку наврати изјави дека не е проблем пратениците во Собранието да ги гласаат уставните амандмани, но како услов за тоа постави тие да бидат со одложено дејство, односно да влезат во сила тогаш кога за Македонија ќе биде донесена одлука да стане членка на ЕУ. Мицкоски овој став првпат го изнесе по лидерската средба со премиерот Димитар Ковачевски на која зборуваа за уставните измени.
Исто така, овој предлог на Мицкоски, опфаќа и влада без ДУИ.