Курти вели дека на Косово му е потребно владеење на правото и датум за избори и додава дека во меѓувреме Косово може да го намали присуството на специјални полициски единици доколку „насилните екстремисти“ престанат со немирите
Косово и Србија имаат договор за нормализација на односите што мора да го применат, изјави косовскиот премиер Албин Курти на денешната конференција „Европска Хрватска: ретроспектива и перспектива“ што се одржува во Дубровник.
Курти истакна дека на Косово му е потребно владеење на правото и датум за избори и додаде дека во меѓувреме Косово може да го намали присуството на специјални полициски единици доколку „насилните екстремисти“ престанат со немирите.
САД и ЕУ претходно го повикаа Курти да ги отстрани албанските градоначалници од функциите во северните општини со мнозинско српско население и специјалните полициски единици кои помогнаа во назначувањето на градоначалниците.
„Мислам дека тоа е патот напред, заедно со интензивен дијалог за имплементација на договорот и имаме договор што мора да го спроведеме“,
рече Курти.
Во март Косово и Србија се договорија за спроведување на договорот со ЕУ за нормализација на односите, што де факто ќе донесе взаемно признавање, но српскиот претседател Александар Вучиќ одби да го потпише.
„Тоа е големо достигнување на ЕУ. Дојдовме до ситуација Косово и Србија конечно да постигнат договор за нормализација“,
додаде Курти.
Косовскиот премиер во Дубровник изјави дека „Европската унија е најважниот проект за мир и просперитет од Втората светска војна“ и дека се приклучил на дијалогот со Србија затоа што е „организиран од Европската унија, што го олеснува тој разговор”.
Курти учествува на конференцијата „Европска Хрватска: ретроспектива и перспектива“ организирана од хрватскиот европратеник Тонино Пицула во Дубровник
„Хрватска е водечки партнер и сојузник, а Хрватска ја гледаме како многу успешен пример во контекст на членството во Европската унија и НАТО“,
рече премиерот на Косово.
Во последните немири во Косово на крајот на мај беа повредени десетици мировници на НАТО и српски демонстранти од северот на Косово.
Немирите се случија откако косовските власти поставија градоначалници етнички Албанци во општинските канцеларии.
Градоначалниците беа избрани врз основа на излезеност од само 3,5 отсто, откако мнозинството Срби во тој регион ги бојкотираа локалните избори.