Во анкета на „Алфа рисрч“ за БНТ, на прашањето „да бевте пратеник, како би гласале во пленарната сала за избор на владата Денков–Габриел?“, 52 отсто од испитаниците одговориле дека би гласале „за“. Против, пак, се 35 отсто
Народното Собрание на Бугарија утре треба да гласа за новата влада предложена од коалицијата „Продолжуваме со промените – Демократска Бугарија“ (ПП-ДБ) предводена од Кирил Петков, кој договори влада заедно со ГЕРБ на Бојко Борисов.
Двата најголеми ривали договорија заедничка влада со ротирачки премиер откако и по пет последователни парламентарни избори ниту една коалиција не успеа да освои доволно пратеници за сама да формира влада.
Утрешното гласање е закажано откако денеска претседателот Румен Радев донесе указ за гласање на новиот владин кабинет.
Претседателот на бугарскиот парламент Росен Желјазков веднаш потоа свика вонредна седница чиј почеток го закажа за утре во 13 часот по локално време. На дневен ред е избор на премиер, усвојување на структурата на владата и избор на министрите.
Според договорот на ПП-ДП и Демократска Бугарија, во првите девет месеци владата ќе биде раководена од Николај Денков кој е кадар на Продолжуваме со промените. Марија Габриел од ГЕРБ, пак, ќе биде единствена вицепремиерка и министерката за надворешни работи, а по девет месеци ќе се ротираат на функциите со Денков.
Во пресрет на утрешното гласање, БНТ објави анкета направена од „Алфа рисрч“, според која мнозинството граѓани на Бугарија го поддржуваат овој владин кабинет.
На прашањето „да бевте пратеник, како би гласале во пленарната сала за избор на владата Денков–Габриел?“, 52 отсто од испитаниците одговориле дека би гласале „за“.
„Против“ би биле 35 отсто, а „воздржани“ – 13 отсто.
Анкетата била спроведена денеска, телефонски, на примерок од 400 полнолетни граѓани од цела Бугарија.