Шефицата на Европската комисија, Урсула фон дер Лајен, нагласила дека ЕУ ќе продолжи со силната поддршка за земјава во процесот на постигнување политички консензус за уставните измени
Европската Унија останува пријател и партнер на Северна Македонија и ѝ дава силна поддршка во процесот на постигнување политички консензус за уставните измени, му порачала шефицата на Европската комисија, Урсула фон дер Лајен, на премиерот Димитар Ковачевски на маргините на Глобалниот безбедносен Форум „Глобсек 2023“.
Во оваа насока, на средбата било изразено очекување дека сите политички чинители во земјава ќе ја препознаат важноста за иднината на С Македонија и ќе дејствуваат во корист на нејзина интеграција во ЕУ.
„Двајцата соговорници ја потврдија посветеноста и ангажманот на ЕУ за интеграција на земјите од Западен Балкан, истакнувајќи дека со тоа позитивно се влијае врз политички процеси и реформската агенда, стабилноста, безбедноста и економскиот просперитет на нашите општества“,
се наведува во соопштението на Владата во кое се информира за средбата меѓу премиерот и претседателката на ЕК.
Ковачевски се заблагодарил за поддршката што Европската комисија ѝ ја пружа на земјава во секоја фаза од процесот на интеграција во ЕУ и ја потенцирал заложбата на Владата за исполнување на реформите од клучните поглавја од пристапниот процес во ЕУ.