Одлуката е донесена по извештајот на белоруската опозиција во егзил, во кој се наведува дека 2 150 украински деца, меѓу кои и сирачиња на возраст меѓу 6 и 15 години, биле однесени во таканаречените рекреативни кампови и санаториуми на белоруска територија
Украина ја истражува можната улога на Белорусија во присилното преселување на деца од територијата окупирана од Русија, соопшти денеска Канцеларијата на главниот обвинител.
Одлуката е донесена по извештајот на белоруската опозиција во егзил, во кој се наведува дека 2 150 украински деца, меѓу кои и сирачиња на возраст меѓу 6 и 15 години, биле однесени во таканаречените рекреативни кампови и санаториуми на белоруска територија.
Група белоруски политички противници на Александар Лукашенко изјавија во прелиминарниот извештај дека децата биле однесени на најмалку три локации во Белорусија.
Канцеларијата на главниот украински обвинител, Андриј Костин, изјави за Ројтерс дека отворила постапка за присилна депортација на повеќе од 19 000 деца од окупираните региони Донецк, Луганск, Запорожје, Херсон и Харков, во Белорусија.
„Фактите и околностите за трансферот на украинските деца од привремено окупираните територии во таканаречените рекреативни кампови во Белорусија во моментов се под истрага во кривична постапка“,
се вели во соопштението.
Во март, Меѓународниот кривичен суд (МКС) издаде налог за апсење на рускиот претседател Владимир Путин и неговиот омбудсман за правата на децата, Марија Лавова-Белова, поради преместување на стотици украински деца во Русија.
Доколку се потврди дека ова е вистина, Јулија Ајоф, британски експерт за правата на децата од Универзитетскиот колеџ во Лондон, рече дека Белорусија е „многу веројатно“ да ја прекрши Конвенцијата за правата на детето.
Дејствата на Белорусија, исто така, може да спаѓаат во злосторства против човештвото, доколку има доволно докази дека присилните трансфери се широко распространети или систематски, додаде таа.
Во извештајот на белоруската опозиција се наведува и дека трансферот на деца е незаконски и ги прекршува Женевската конвенција и Статутот на МКС.
„Лукашенко лично нареди префрлање на сирачињата во Белорусија и го олесни нивното пристигнување со финансиска и организациска поддршка“,
се вели во извештајот.