Според неофицијални податоци, осомничените се рекламирале на социјалните мрежи дека поседуваат фотографии и видеа од детска порнографија, а потоа за паричен надомест ги продавале фотографиите и видеата на други лица
Министерството за внатрешни работи (МВР) на Република Српска уапси девет лица под сомнение дека извршиле неколку кривични дела – експлоатација на деца за порнографија, перење пари и нелегално производство и тргување со оружје или експлозивни материјали.
Постапувајќи по наредба на надлежните судови, полициските службеници извршиле претреси на осум локации за кои било утврдено дека ги користеле лица поврзани со извршувањето на наведените кривични дела.
Во претресот се пронајдени и одземени компјутери, таблети, мобилни телефони, мемориски картички, сим-картички и други уреди за чување на дигитални податоци, како и предмети кои може да се поврзат со извршувањето на кривичните дела, се наведува во соопштението на Министерството.
Локалните медиуми неофицијално објавија дека уапсените се осомничени дека преземале фотографии и видеоснимки од веб-страници кои содржеле материјали од детска порнографија, по што, користејќи социјални мрежи и апликации за комуникација, ја споделувале таа содржина во неколку наврати.
Според неофицијални податоци, осомничените се рекламирале на социјалните мрежи дека поседуваат фотографии и видеа од детска порнографија, а потоа за паричен надомест ги продавале фотографиите и видеата на други лица. Плаќањето се вршело преку платежниот сервис „Пејпал“, каде осомничените имале свои сметки на кои ги примале уплатите.