Гир вели дека иако владеењето на правото и борбата против корупцијата се клучни и суштински во процесот на проширување на ЕУ, сепак, во државава на овие полиња има голем број загрижености кои се продлабочуваат во изминатите месеци
Евроамбасадорот Дејвид Гир вели дека во државата има напредок, има чувство дека работите се движат напред особено во однос на усвојувањето на уставните измени во согласност со билатералните обврски преземени со Договорот меѓу Северна Македонија и Бугарија. Наредниот чекор, како што рече Гир на денешниот состанок на Мешовитиот парламентарен комитет во македонското Собрание, е усвојувањето на уставните измени во согласност со билатералните обврски, со што ќе започне втората меѓувладина средба без натамошни пречки.
Добро е, како што вели Гир, успехот од скринингот да се удвои и со напорите со ЕУ-агендата. Собранието, додаде тој, има голема улога за градење на национален консензус меѓу партиите што е клучно за Северна Македонија одлучно да продолжи по европскиот пат.
„Но, за жал, и покрај политичките заложби од двете страни за иднината на Северна Македонија во Европската Унија, сè уште нема заеднички дневен ред за потребните реформи. Политичкиот јаз се продлабочува и потребните реформи затоа назадуваат“,
рече евроамбасадорот Гир.
Гир рече дека иако владеењето на правото и борбата против корупцијата се клучни и суштински во процесот на проширување на ЕУ, сепак, во државава на овие полиња, како што рече, има голем број загрижености кои се продлабочуваат во изминатите месеци.
„Важно е да се адресираат недостатоците во спроведувањето на соодветните закони со што се обезбедува независноста и интегритетот на судиите. Овие прашања неодамна се појавија преку состојбите во Судскиот совет, тело одговорно за заштита и промовирање на овие принципи. Политичарите и политичките партии треба да ги одбиваат сите обиди на заробување на институциите, а Судскиот совет и судството имаат свои одговорности и обврски. Пензионирањето на судиите исто така влијае, па така, приоритет е да се зајакнат човечките ресурси како во судството, така и во обвинителството. Процесот на избор на двајца судии во Уставниот суд и двајца членови во Советот на обвинители трае долго и треба што поскоро да се заокружи врз принципот на меритократија“,
додаде Гир.
Евроамбасадорот потсети и дека европското знаменце и забрзаните постапки за закони треба да се во голема мера ограничени. Воедно, порача на максимална вклученост на јавноста во донесувањето на одлуките во Собранието.
Гир ги поздрави позитивните оценки за земјава од „Репортери без граници“, но истакна дека новинарите мора да бидат заштитени од говорот на омраза.
Државната секретарка во Секретаријатот за европски прашања Дрита Абдиу Халили рече дека ги очекуваат извештаите од скринингот што е можно побрзо, со цел, како што посочи, да бидат задржани фокусот и мотивацијата за реформи и во администрацијата и во општеството во целина.
„Скрининг-извештајот за фундаментални вредности е основа за подготовка за трите патокази – патоказ за владеење на правото со акцискиот план за малцинства, патоказ за реформа на јавната администрација и двата како одредници за отворање на првиот кластер, како и патоказ за функционирање на демократските институции вклучително и продлабочување на дијалогот околу економското управување и исполнување на европските критериуми“,
рече таа.
Амбасадорката на Кралството Шведска, Ами Ларсон Џеин, ја поздрави усогласеноста на државата со надворешната и безбедносната политика на ЕУ, која ја оцени како силен знак за стратешката посветеност на земјава за членство во Европската Унија.