Според наводите на Советот на покраината, во овој инцидент биле погодени вкупно 63 лица, од кои 22 се пренесени во болница
Најмалку 59 деца колабирале како последица на труење со хемикалии во фискултурна сала во училиште во Пирна, Германија.
Во текот на часот по физичко, прво седум деца се пожалиле на мачнина, вртоглавица, трпнење во рацете или нозете. Трпнење во рацете пријавила и професорката по физичко.
Оваа сала ја користат две училишта, едно основно и едно средно. Двете училишта веднаш ги повикале надлежните. Во училиштата биле испратени неколку амбулантни возила, а лекарите, како што пренесува германски „Билд“, требало да им укажат помош на голем број ученици.
Првично, бројот на деца што се пожалиле биле 32, а подоцна полицијата соопшти дека до доцните попладневни часови помош им била укажана на 59 ученици и еден наставник. Според наводите на Советот на покраината, во овој инцидент биле погодени вкупно 63 лица, од кои 22 се пренесени во болница.
„На четвртиот час имавме физичко образование. Немаше мирис кога влеговме во салата, но почнаа да ме болат главата и вратот. Наставничката нè извади од салата. Ни рекоа дека истекла некоја хемикалија”,
вели еден осмоодделенец за „Билд“.
Портпаролот на полицијата, Марко Ласке, изјави дека, според првичните информации, до инцидентот дошло поради употреба на хемиско средство за чистење.