Инспектори на ДСЗИ утре повторно во битолската болница, овој пат поради смртта на новороденчето

Ова ќе биде вторпат за дваесетина дена како инспектори на Државниот санитарен и здравствен инспекторат ќе вршат надзор во битолската болница по трагичен случај. Кон крајот на март во оваа болница почина шестгодишната Јана, а надлежните институции, меѓу кои и Основното јавно обвинителство Битола, сè уште го чекаат извештајот од обдукцискиот наод кој треба да ги утврди причините за смртта на девојчето

Тим на Државниот санитарен и здравствен инспекторат (ДСЗИ) утре ќе изврши инспекциски надзор во битолската болница, соопшти денеска министерот за здравство Фатмир Меџити откако уште еден случај, овој пат со починато новороденче, ја вознемири јавноста.

Министерот за здравство денеска, речиси истовремено откако почнаа да се појавуваат вести за починатото бебе, ја посети битолската болница за, како што рече, на самото место да види што се случило.

„Затоа сме тука денеска, да видиме одблиску што се случило. Утре ќе испратиме комисија од инспектори од Државниот санитарен и здравствен инспекторат кои ќе утврдат што точно била причината (за смртта). Како што видов во првичниот извештај, (бебето) било родено живо, но со брахикардија, имало белодробно срцево оживување и понатаму сè ќе кажеме кога ќе имаме дефинитивни резултати од институциите што се надлежни“,

рече Меџити.

Почина бебе во битолската болница: На родилката ѝ дале апче за провокација и ја пратиле дома, кога дошла да се породи вечерта, веќе било доцна

Ова ќе биде вторпат за дваесетина дена како инспектори на Државниот санитарен и здравствен инспекторат ќе вршат надзор во битолската болница по трагичен случај.

Кон крајот на март во оваа болница почина шестгодишната Јана, а надлежните институции, меѓу кои и Основното јавно обвинителство Битола, сè уште го чекаат извештајот од обдукцискиот наод кој треба да ги утврди причините за смртта на девојчето.

„За Јана чекаме конкретен извештај од обдукцијата“,

изјави денеска министерот за здравство, кој изрази сочувство до младата родилка за изгубеното бебе.

Јовески: Сослушани се повеќе лица за смртта на малата Јана, сè уште се чека извештајот од обдукцијата

Тој најави дека доколку се утврдат пропусти во конкретниот случај, ќе се бара и одговорност.

Одговарајќи на новинарско прашање, Меџити соопшти дека разговарал со мајката што го изгубила бебето и дека станува збор за 24-годишна жена, но не сакаше да каже кога точно се случила трагедијата и остави на ова и на други прашања да одговорат надлежните институции.

Во врска со недостигот на кадар во битолската болница, министерот за здравство изјави дека ова не е проблем само на оваа болница, туку на здравствените установи во целата држава.

„Јас еден месец сум министер и овие работи нема да се средат преку ноќ, но пополека мора да настојуваме да имаме подобри резултати во иднина и да не ни се случуваат вакви немили настани“,

рече Меџити.