Од УЈП велат дека споделувањето на личните податоци преку оваа лажна веб-страница може да предизвика нивна злоупотреба
СМС-пораки во кои се бара да се изврши задолжителна пријава на лажната страница https: ujp-gov.mk/potvrda деновиве стигнуваат на телефоните на граѓаните. Од Управата за јавни приходи упатуваат апел до граѓаните никако да не ја отвораат оваа лажна веб-страница.
„Никако не отворајте ја оваа лажна веб-страница бидејќи од вас бара да пополните полиња со вашите лични податоци, податоци од платежна картичка и да прикачите слика од вашата лична карта“,
велат од УЈП.
Оттаму додаваат дека споделувањето на личните податоци преку оваа лажна веб-страница може да предизвика нивна злоупотреба.
„Веб-страницата е лажна, не e во сопственост на Управата за јавни приходи. Испраќачот на пораките се обидува да ги злоупотреби името и логото на УЈП и да ги доведе во заблуда граѓаните, да споделуваат лични податоци и на тој начин да се изложат на ризик и можна злоупотреба. Управата за јавни приходи ги презема сите неопходни активности за справување со оваа состојба“,
додаваат од Управата.
На официјалната веб-страница се поставени фотографии од лажната која не треба да се отвора.
